அரபு நாட்டு அமீரகம் அளிக்கும் கேரள வெள்ள நிதி

அரபு நாடுகளான அமீரகம் அளிக்கும் நிதியினை இந்தியா ஏற்க தயங்குவது குறித்து ஏகபட்ட கருத்துக்கள்

பொதுவாக எந்த நாடும் யாருக்கும் சும்மா கொடுக்காது, ஒவ்வொரு அசைவிலும் தனக்கு ஏதும் ஆதாயம் உண்டா என தேடும் உலகிது

இதில் எந்த நாடும் விதிவிலக்கு அல்ல‌

உதவி என சொல்லிவிட்டு பின்னாளில் நம் கையினை கட்டிபோடும் தந்திரங்கள் நடைபெறலாம், பல விஷயங்களில் இந்திய நலன் பாதிக்கபடலாம்

இது பல நாடுகளில் நடந்திருக்கின்றது, நடந்துகொண்டிருக்கின்றது

மத்திய அரசு யோசிக்கின்றது என்றால் அதில் ஆயிரம் காரணங்கள் இருக்கும், திரைமறைவில் என்ன கோரிக்கையினை அரபிகள் வைக்கின்றார்கள் என்பது தெரியாது

அரேபிய தொடர்பில் இங்கு நடக்கும் தங்க வைர வியாபாரம் கொஞ்சமல்ல‌

கேரள வியாபாரிகளும், குஜராத் வியாபாரிகளும் அதில் கை ஓங்கி நிற்பதும் கவனிக்க வேண்டியவை

இவர்களின் தலமையகம் அரேபிய நாடுகள் என்பது சொல்லி தெரியவேண்டியதில்லை

இதில் குஜராத் ஜூவல்லரி வியாபாரிகள் ஒவ்வொருவராக முறைகேடுகளில் சிக்கி ஓடிகொண்டிருக்கின்றார்கள்

அடுத்து மலையாளிகள் யாரும் சிக்குமுன் அரபு நாடுகள் ஒடிவந்து முன் நிற்கும் தந்திரமாக இருக்கலாம்

நாளையே ஒரு ஜூவல்லரி அதிபர் கம்பி நீட்டிவிட்டு அமீரகத்தில் செட்டில் ஆகிவிட்டால் அவனை தரமுடியாது என் பேரம் பேசும் நிகழ்வுகள் இருக்கலாம்

இதுபோக அரபு நாடுகள் தங்கள் எண்ணெய்க்கு இந்தியாவில் குடோன் அமைப்பது உண்டு, இப்படி கொடுத்துவிட்டு அதற்கு வாடகை கொடுக்கமாட்டொம் என அடம்பிடிக்கலாம்

ஏகபட்ட சாத்தியங்கள் உண்டு

மத்திய அரசு இந்நாட்டிற்கு எது நன்மையோ அதை நிச்சயம் செய்யும், அதில் சந்தேகமில்லை

மீண்டும் மனுஷ் விவகாரம்

இந்த மனுஷ் விவகாரத்தை பேச ஆரம்பித்தில் இருந்து ஏகபட்ட திமுகவினர் குறிப்பாக இஸ்லாமிய திமுகவினர் நம்மை மிக கடுமையாக தாக்கி கொண்டிருக்கின்றார்கள்

அவர்கள் நம்மை சங்கி, இஸ்லாமிய விரோதி என சொல்லும் பொழுது அவர்களிடம் நாம் கேட்கும் கேள்வி ஒன்றே ஒன்றுதான்

ஏனப்பா நாம் இஸ்லாமிய விரோதியா இல்லை திமுகவா?

அங்கே நடக்கும் விஷயங்களை கவனியுங்கள் உங்களுக்கே புரியும்

திமுக இஸ்லாமிய உறவு என்பது கண்ணியமிக்க காயிதே மில்ல்த் காலத்திலிருந்தே தொடர்வது

கலைஞர் அதை மிக கவனமாக பின்பற்றினார் திமுக கட்சி உயர் பதவிகளில் எல்லாம் இஸ்லாமியர் இருக்குமாறு பார்த்து கொண்டார்

சாதிக் பாட்சா போன்றோர் பொருளாளர் உட்பட பல பதவிகளில் இருந்தது அப்படித்தான்

கலைஞருக்கு பின் நிலமை என்ன?

தலைவர் ஸ்டாலின் என்றாலும் இதர பதவிகளுக்கு மோதல் வலுக்கின்றது அதில் ஒருவர் கூட இஸ்லாமியர் இல்லை

ஏன் திமுக தலமை நினைத்தால் ஒரு இஸ்லாமியரை உயரே கொண்டுவர முடியாதா? நொடியில் முடியும்

ஆனால் செய்யவில்லை

இஸ்லாமிய துரோகம் எங்கே நடக்கின்றது என கவனமாக பார்த்துவிட்டு என்னை வந்து திட்டுங்கள்

நாம் சங்கியா இல்லை திமுகவில் இஸ்லாமியரை உயர் பதவிக்கு வரவிடாமல் தடுக்கும் சக்திகள் சங்கியா?

ஆனால் நீங்கள் அவர்களை விட்டு என்னையே திட்டிகொண்டிருக்கின்றீர்கள்

இனியாவது யோசியுங்கள் என்னை சங்கி என சொல்லமாட்டீர்கள் , இஸ்லாமிய விரோதம் யார் செய்கின்றார்கள் என்பது புரியும்

நாட்டில் உள்ள அடிமைகளில் ஆயிரத்தில் நான் ஒருவன்

Image may contain: 2 people, text

எப்பொழுது மனம் விட்டு சிரிக்க வேண்டுமென்றால் ராமசந்திரன் படங்களை பார்ப்பதுண்டு

குறிப்பாக பாடல் காட்சிகளை மியூட் செய்துவிட்டு பார்த்தால் அவரின் அஷ்டகோணலான முகபாவத்தை பார்த்து சிரித்துகொண்டே இருக்கலாம், அதற்கு ஈடே இல்லை

சில படங்களின் நடிப்பு எனும் பெயரில் அவர் செய்யும் சேட்டைகளை கண்டால் நரசிம்மராவ் என்பவரே சிரித்து சிரித்து செத்திருப்பார்

கோபம் , காதல், உருக்கம் எல்லாவற்றிற்குமே உதட்டை கடித்து காமெடி செய்யும் அந்த சிரிப்பு நடிப்பு யாருக்கும் வராது

இன்று ஆயிரத்தில் ஒருவன் சிக்கி இருக்கின்றது

“நமக்கு வாய்த்த அடிமைகள் மிகவும் திறமைசாலிகள்” எனும் அந்த புகழ்மிக்க அதிமுக தத்துவம் இப்படத்தில் பேசபட்டது

ஜெயலலிதா மேல் விழும் மரத்தை ஒடி வந்து தாங்கி அவரை காப்பாற்றுவதாக அவர் இதோ புல் அப்ஸ் எடுத்து கொண்டிருக்கின்றார்

இப்படியே முதலமைச்சர் பதவி ஜெயா மீது விழாமல் அவர் காப்பாற்ற்றிவிட்டு சென்றிருந்தால் எவ்வளவு நன்றாக இருந்திருக்கும்

அடுத்து “ஏன் என்று கேட்காமல் வாழ்க்கை இல்லை” என்ற பாடல் வேறு

ஆனால் அவர் கட்சியிலோ “ஏன் என்று கேட்காமல் இருந்தால்தான் வாழ்க்கை”

அது பன்னீருக்கும் பழனிசாமிக்கும் இன்னும் பலருக்கும் கிடைத்திருக்கின்றது.

இதில் பல இடங்களில் பழனிச்சாமிக்கும் பன்னீருக்கும் பொருத்தமான வசனத்தை பேசியிருக்கின்றார் ராமசந்திரன்,

அது “அடிமைகள் வரவேற்கபடுவதில்லை”

இது டெல்லியில் பழனிச்சாமிக்கும் பன்னீருக்கும் பேச வேண்டிய முக்கியமான வரிகள்

ஆக அடிமைகளான தமிழக அதிமுக அரசுக்கு இப்படத்தில் ஏகபட்ட வசனங்கள் உள்ளன, “அதோ அந்த பறவை போல..” என்ற பாடலும் கூட அவர்களுக்காகத்தான்

பழனிச்சாமி தன் அமைச்சர்களுடன் இப்படத்தை பார்த்தால் மனம் விட்டு அழுவார், நிச்சயம் அவர்களுக்கான படம் இது

“நாட்டில் உள்ள அடிமைகளில் ஆயிரத்தில் நான் ஒருவன்..” என பழனிச்சாமி அழுதால், அமைச்சரவையே அழுதுவிடாதா?

அந்த செங்கோடன் எனும் வில்லன் வேடம் வேறு அப்படியே தாடியும் ஆளுமாக மோடி பொலவே இருகின்றது, போதாதா?

நாகேஷ் போகுதே “மானம் கப்பல் ஏறி போகுதே” என பாடும்பொழுது அப்படியே தமிழக நிலை கண்முன் வருகின்றது

(முக்கியமான வரலாற்று செய்தி என்னவென்றால் இந்தி எதிப்பினை மிக தீவிரமாக திமுக செய்து கொண்டிருந்த பொழுது, தமிழ்நாட்டில் ஏகபட்ட பேர் இறந்தபொழுது கோவா பக்கம் ஜெயலலிதாவோடு ராமசந்திரன் ஆடிகொண்டிருந்த படம் இது

பின்னாளில் இவர்கள் தமிழ்நாட்டு முதல்வரானதுதான் விசித்திரம்)

கரிகால் சோழன் காலத்திற்கு பின் இப்போதுதான் காவேரி வெள்ளம்

காவேரி வெள்ளம் கரிகால் சோழன் காலத்திற்கு பின் இப்பொழுதுதான் வந்திருக்கின்றது

இப்பொழுதும் கடைமடை பகுதிக்கு காவேரி நீர் செல்லவில்லையாம், காரணம் மராமத்து பணிகள் இல்லை, கால்வாய் தூர்வார படவில்லை என ஏகபட்ட புகார்கள்

8 வருடமாக தமிழகத்தை ஆள்வது யாரென்றால் சாட்சாத் இந்த அதிமுக கோஷ்டி

ஜெயா 6 ஆண்டுகளும் பழனிச்சாமி 2 ஆண்டுகளுமாக கணக்கு வருகின்றது

யாராவது ஒருவன் இந்த நிலைக்கு காரணம் அதிமுக அரசு என சொல்வானா என்றால் இல்லை

இந்த அய்யாகண்ணு போன்ற யாராவது இதை சொல்வார்களா என்றால் நிச்சயம் இல்லை

இப்பொழுதும் 8 வருடமாக ஏன் அதிமுக அரசு தூர்வாரவில்லை என கேளுங்கள், அதற்கு முன் இருந்தது திமுக அரசு என சிரிக்காமல் பதில் வரும்


கலைஞர் இருக்கும் பொழுது அவர் முன்னால் பஜனை பாடியவர்கள், அவர் இல்லாதபொழுது அவர் சமாதி முன் கூடுதல் பக்கவாத்தியங்களுடன் பாடுகின்றார்கள்

இதில் ஆச்சரியமோ , அதிசயமோ ஒன்றுமில்லை

இருந்து பாருங்கள், திமுக மாநாடுகளில் கலைஞரை பல்லக்கில் அழைத்து சென்றது போல இனி கலைஞர் சிலை வைத்து தேரும் இழுப்பார்கள்

அரசியல்வாதிகள் பலவகை, ஒவ்வொருவரும் ஒவ்வொரு வகை

இதில் எ.வ வேலு ஸ்பெஷல் வகை


மெட்ராஸ் டே

Image may contain: one or more people, sky, outdoor and water

மெட்ராஸ் டே

சீனாவின் பட்டும், இந்திய மிளகும் பட்டுசாலை எனும் சாலை வழியாக துருக்கி மூலம் ஐரோப்பாவினை அடைந்துகொண்டிருந்தன, அது ஒன்றே பிரதான இணைப்பு.

அலெக்ஸாண்டர் காலம் முதல் போப்பாண்டவர்கள் உச்ச காலம் வரை அது ஐரோப்பியர் கட்டுபாட்டிலே இருந்தது, வியாபாரம் அதன் மூலமே நடந்தது.

இது யார் கட்டுபாட்டில் இருப்பது என்று தொடங்கிய அரசியல் போர், பின் மதச்சாயம் பூசப்பட்டு சிலுவைப்போர் என தொடர்ந்தது, வலுவான துருக்கியர் அனாசாயமாக விரட்டினர், இந்நிலையில்தான் எப்படியோ ஆசியா சுற்றி வந்து , இந்தியாவினை பார்த்து வாயினை பிளந்தான் அவன்

இன்று நாம் ஐரோப்பாவினை ஆஆஆ என பார்கின்றோம் அல்லவா? அப்படி.

Image may contain: 1 person, smiling, close-upஉலகின் வரலாற்றை மாற்றி போட காரணமாயிருந்தவன் மார்க்கோ போலோ, இத்தாலிக்காரர் (இத்தாலியருக்கு இந்தியா என்றாலே ஒரு விருப்பம் போலும் ), வியாபாரிதான் ஆனால் இந்தியா, சீனம் என ஆசியாவினை சுற்றிவிட்டு ,செல்வம் இந்தியாவில் குவிந்து கிடக்கிறது என்ற ஐரோப்பியரின் கனவிற்கு, ஆமாம் நானே கண்ணால் பார்த்த சாட்சி என்று சூடமேற்றி சத்தியம் செய்தவர்.

அதுமுதல் “இந்தியா கிறுக்கு” பிடித்து அலைந்தது ஐரோப்பா, தேடினார்கள், முதல்வெற்றி போர்ச்சுகல்லுக்கு உபயம் வாஸ்கோடகாமா, பலர் வந்தார்கள் , அவர்கள் வரும்பொழுது, முக்கால சோழ நாட்டின் பகுதியான அந்த கடற்கரை நாயக்கர்களுக்கு கட்டுபட்டதாயிருந்தது, ஆனாலும் ஆண்டு கொண்டிருந்தது ஆற்காடு நவாப்.

அந்த பகுதியை சுற்றி சுற்றி பார்த்தார்கள், வியாபாரம் செய்ய வந்தவர்கள்தான் ஆனால் போர்த்துகீசியரின் சமயபற்று ஆழமானது, ஒரு கிறிஸ்தவ போதகர் எப்படியோ இந்த பகுதிக்கு வந்திருக்கிறார், இறந்திருக்கிறார், அவரின் கல்லறை அங்கிருக்கின்றது என்பதை கண்டுகொண்டு ஆராய்ந்தார்கள், அமைதியானார்கள்.

முழங்காலிட்டு பிதா,சுதன்,பரிசுத்த ஆவி அடையாளமிட்டு சொன்னார்கள், இது இயேசுகிறிஸ்து கூட இருந்த செயிண்ட் தாமஸ்(போர்த்துகீசிய மொழியில் சாந் தோம்ஸ்), அவருக்கு ஆலயமும் கட்ட தொடங்கினார்கள் “சாந்தோம்” என பெயரிட்டார்கள்,வணங்கினார்கள்.

(புனித தோமையார் இந்தியா வந்தார் என்பதற்கு நச்சென்ற ஆதாரமில்லை, ஆனால் யாரோ ஒரு கிறிஸ்தவ துறவி வந்திருக்கிறார், பெயர் தாமஸாக இருக்கலாம்)

ஒரு மாலுமியாக அந்த போர்த்துகீசியரும் வந்தார், நீண்ட‌ தாடிவைத்திருந்தார், “மெட்ருஸ்” என்பது அவரின் பெயர், வந்த இடத்தில் இறந்தார், அவரை புதைத்த இடத்திற்கு அடையாளமிட்டார்கள் “மெட்ராஸ்”, இதுதான் 1996 வரை நீடித்த பெயர்.

பின்னால் வந்த பிரிட்டனும்,பிரான்சும் போர்ச்சுக்கல்லை பிடரியில் பிடித்து தள்ளி விரட்ட, அழுதுகொண்டே மலாக்கா சென்றனர். ஆனால் அந்த “மெட்ராஸ்” என்ற பெயர் மாறவில்லை, வெள்ளையரும் அப்படியே அழைத்தனர், தமிழில் அது “மதராசபட்டினம்” ஆயிற்று.

அந்த இடத்திற்கு கொஞ்சம் தள்ளி, பிரிட்டானியர் கோட்டை கட்டினர், அந்நாளைய பிரிட்னுக்கு புனித ஜார்ஜ, தெற்கத்தியருக்கு பெரும்பாலும் முனியாண்டி, மதுரை வீரன், இசக்கியம்மன், சுடலையாண்டவர் போல அவர்களுக்கு இங்கிலாந்தின் காவல் தெய்வம் ,புனித ஜார்ஜ் பெயரினை இட்டார்கள். மறக்காமல் ஒரு மாதா கோயிலும் கட்டிகொண்டார்கள்.

கோட்டைக்கு நிலம் வாங்கிய நாள் இன்று ஆகஸ்ட் 22ல் கொண்டாடும் சென்னை தினமாம், கோட்டை திறக்கபட்டநாளில்தான் சென்னை தினம் கொண்டாடி இருக்கவேண்டும், ஆனால் யாரோ புண்ணியவான் பத்திரம்முடிந்த நாளையே குறித்துவிட்டார்கள், பரவாயில்லை.

வெள்ளையர்கள் தென்னிந்தியாவிற்கு செய்த பெரும் உதவி அந்த கோட்டை, கிட்டதட்ட 90 வருடங்கள் மதராஸ் ராஜதானி அதாவது madras presidency (கன்னடம், கேரளம்,ஆந்திரா,தமிழ்நாடு) என தென்னிந்தியாவின் கட்டுப்பாட்டு அறையாக திகழ்ந்ததும் அந்த கோட்டை, மாநிலங்கள் பிரிக்கபட்டபின் இன்றுவரை தமிழக தலைவிதி எழுதபடுவது எல்லாம் அந்த கோட்டைதான், பலவகை விவாதங்ள், தலைவரின் சிறப்புரைகள்,சட்டங்கள், தீர்மானங்கள் என‌ இன்னும் பல சிறப்புகளுக்கு அடையாளம் அந்த கோட்டை.

இத்தாலியின் வெனிஸ் போலவே திட்டமிட்ட நீர்வழிச்சாலையினையும் வெள்ளையர்கள் அமைத்திருக்கின்றார்கள், அந்த சென்னை அப்படித்தான் இருந்திருக்கின்றது, பின்னாளில் எல்லாம் நாசமாய் போய்விட்டது.

எதனை ஒழுங்காக பராமரித்தோம் நாம்?.

இந்த இடம் கோட்டைக்காக வாங்கும் பொழுதும், அதில் பெரும் லண்டன் கனவான்கள் ஆளும்பொழுதும், நிச்சயம் திருக்குவளை வாரிசும், மைசூர் வாரிசும் வந்து சண்டையிடும் என்றெல்லாம் நினைத்திருப்பார்களா? விதி எப்படி எல்லாம் ஆடுகின்றது.

அட அதன் பின் தேனிக்காரரும், கோவைக்காரரும் வந்து ஒன்றாக இணைவார்கள் என யார் எதிர்பார்த்திருப்பார்கள்?

அக்கோட்டையில்தான் இந்தியாவில் வெள்ளையர் ஆட்சியினை தொடக்கி வைத்த ராபர்ட் கிளைவ் வசித்தான், அதன் மாடத்திலிருந்து அவன் தேநீர் பருகுவானாம், அவனின் திருமணம் கூட சென்னை கோட்டையில்தான் நடந்தது,

அப்பொழுது சென்னை பகுதி நதிகள் எல்லாம் ஓடங்கள் ஓடுமாம், அதில் அவனுக்கு பிடித்தமான நதியில் அவன் படகோட்டுவானாம்

அதில் ஒன்று கூவம், இன்று நாறி கிடக்கும் கூவம், விடுங்கள். அக்காலம் அவ்வளவு அழகாய் இருந்திருக்கின்றது.

நிச்சயமாக சென்னைக்கு திருப்புமுனை கொடுத்ததே அந்த கோட்டைதான், அது அமையாவிட்டால் சென்னை இந்த அளவிற்கு வளர்ந்திருக்காது, , அசுரவேகத்தில் கிட்டதட்ட 60 கிராமங்களை விழுங்கி இன்று பிரமாண்டமாய் எழுந்து நிற்கிறது, இன்று கிட்டதட்ட 80லட்சம் மக்கள் வாழும் நகரம், ஆசியாவின் குறிப்பிடதக்க நகரங்களில் ஒன்று

பகை நாடுகளின் பெரும் இலக்குகளில் சென்னையும் ஒன்று, சில நாடுகளின் ஏவுகனைகளின் நுனி சென்னை நோக்கியே திருப்பபட்டு நிற்கிறது. அது அவ்வாறாக இருப்பதில் கொழும்பிற்கும் மகிழ்ச்சி.

சென்னையும், அதற்கு காரணமான ஜார்ஜ் கோட்டையும் பல ஆபத்துக்களை கடந்துள்ளன், பாண்டிச்சேரி பிரென்ஞ் கவர்னர் டூப்ளேவிற்கு அதன் மீது ஒரு கண், பதிலுக்கு வெள்ளையர் அவர் முதுகை உடைத்துவிட்டார்கள், ராபர்ட் கிளைவ் எத்தனையோ போர்களுக்கு அங்கிருந்துதான் திட்டமிட்டான், உத்தரவு கொடுத்தான்.

மாவீரன் மருதநாயகம் பிரெஞ்ச் படைகளை விரட்டி அதனை மீட்டு தான் தன் வீரத்தினை நிரூபித்துகாட்டினான்.

முதலாம் உலகப்போரின் போது உலகை மிரட்டிய ஜெர்மனியின் நீர்மூழ்கி எம்டன் சென்னை கோட்டையை குறிவைத்து தாக்கியது,(அந்த கல்வெட்டு இன்றும் உண்டு), முதலும் கடைசியுமாக சென்னை மீது நடந்த ராணுவ தாக்குதல் அது, அதன் பின்னர் ஆபத்தில்லை

ஆனால் ஆபத்து மொழிவாரி மாநிலங்கள் பிரிக்கப்படும் பொழுது எழுந்தது, சென்னை எங்களுக்கு சென்னை வேண்டும் அல்லது சண்டிகர் போல பொதுநகராக இருக்கலாம் என போராடினர் தெலுங்கர்கள், கிட்டதட்ட அவர்களுக்கு சாதகமான சூழல், அன்றேல்லாம் ஐதராபாத் சிறு நகரம், விசாகபட்டினம் தூத்துக்குடி அளவிற்கே இருந்தது, விடமாட்டோம் என பிரளயம் செய்தனர் தெலுங்கர்கள்.

“எங்க இருந்தா என்ன இந்தியாவில தான இருக்குண்ணேன்??” என காமராஜர் சிந்திக்க, “வெங்காயம் அப்படியும் அது திராவிடநாட்டிலதான இருக்கு” என்று பெரியாரும் ஒதுங்கிகொண்டனர்,அண்ணாவோ பணம் படைத்த பெரியாரை எதிர்த்து என்ன செய்ய என சிந்தித்த காலம், கருணாநிதி அன்று கலைஞர் அல்ல, ஆனால் அறியபட்ட வசனகர்த்தா, அவர் என்ன ஆகபோகின்றார் என்பது அவருக்கே தெரியாத காலம், போராட யாருமில்லை,

ஒரே ஒருவரை தவிர அவர் ம.பொ.சிவஞானம், தமிழரசு கட்சி நிறுவணர்.

அங்கிள் சைமன் தான் முதலில் தமிழர் கட்சி கண்டவர் ,ஆதித்தனார்தான் வழிகாட்டி என யாராவது சொன்னால் அவர்களை அப்படியே ராஜபக்ஸேவிடம் ஒப்படைப்பது அவருக்கு நலம், அரசியலையாவது கற்பிப்பார்.

பலர் தமிழியக்கம் நடத்தினர் அவரில் சிலப்பதிகாரத்தை கரைத்து தெளித்த “சிலம்பு செல்வர்” என அறியபட்ட ம.பொ.சி பிரசித்தம், அவரை விட அவர் மீசை பிரசித்தம், அண்ணாவின் மயக்கும் தேன் தமிழில் சற்று மங்கிபோனவர் ம.பொ.சி.

ஆனால் தமிழரின் எல்லையை காத்த போராட்டம் இவரால் மட்டும்தான் நடைபெற்றது, அவரின் எழுச்சியான போராட்டத்தில் சென்னை தமிழகத்திற்கு வந்தது, திருத்தணியும் வாங்கிகாட்டினார், திருப்பதி முதல் திருஅனந்தபுரம் வரை தமிழரின் எல்லை என முழக்கமிட்டார்.

திரு என்பது தமிழ்பெயர், திருப்பதி தமிழனுக்கே சொந்தமான அடையாளம், என ஆதாரத்தோடு அவர் முழங்கிய முழக்கம் கொஞ்சமல்ல‌

திருப்பதியும் உங்களுக்கா என தெலுங்கள் பொங்கி தற்கொலை முயற்சி வரை சென்றனர், “தேவுடா” தமிழகம் வர மறுத்தார் அங்கே தங்கிவிட்டார், கொஞ்சம் தமிழகம் போராடியிருந்தால் திருப்பதி கிடைத்திருக்கும்,இந்து அறநிலையதுறை அமைச்சருக்கு போரே நடந்திருக்கும்.( பல ஊழலும் நடந்திருக்கும் ), கிடைக்கவில்லை அதுவும் நல்லது.

தந்திரமாக கேரளம் முந்திகொண்டு திருவனந்தபுரம் எங்கள் தலைநகர் என்றது, நிச்சயமாக அன்று அது அவர்கள் தலைநகராக இருக்க சம்பந்தமில்லாதது, அரசியலில் முந்திகொண்டார்கள், அதுவும் பரவயில்லை, இல்லை என்றால் பதமநாபசாமி கோயில் என்ன ஆகியிருக்குமோ, சுரங்கம் அமைத்து தூக்கியிருப்பார்கள், மணலையே விடாத தமிழகம் இது.

சினிமா ஸ்டூடியோக்கள் கூட சென்னையை நம்பாமல் சேலத்தில்தான் அக்காலத்தில் கட்டபட்டன, முதன் முதலில் துறைமுகமாக மட்டும் அறியபட்ட சென்னை கொஞ்சம் கொஞ்சமாக எல்லா தொழிலின் சந்தையாக‌ மாறிற்று, இன்று சென்னையின் நிலை வேறு, தமிழகத்தின் எல்லா கிராமங்களிலிருந்தும் அதனோடு நேரடியாகவோ இல்லை மறைமுகமாகவோ தொடர்பில்லாதவர் யாருமில்லை.

மக்கள் தொகை பெருக,பெருக சில பிரச்சினைகளும் பெருகும், அதனில் சென்னை சிக்கி இருக்கலாம், ஆனால் சில சிறப்புக்கள் சென்னைக்கு எப்போதும் உண்டு.

சாதிய கலவரமோ, இல்லை மத,இன‌ ரீதியான வன்முறைகளிலோ சிக்காத இந்திய நகரங்களில் சென்னையும் ஒன்று, கல்கத்தா,மும்பை என பெருந்தீ எழும்பி தாண்டவமாடிய நகரங்கள் உண்டு, சென்னை அப்படியல்ல, அதன் மக்களும் அப்படியல்ல,

இதுதான் சென்னை இக்காலம் வரை பதித்திருக்கும் முத்திரை.

மயிலாப்பூர் கோயில், கபாலீஸ்வரர் ஆலயம், சாந்தோம் ஆலயம், தாமஸ் மலை,விக்டோரியா ஹாலும் அதிலுள்ள ரவிவர்மனின் ஓவியங்கள், எழும்பூர் மியூசியம், பல தலைவர்கள் வாழ்ந்த இல்லம், விவேகானந்தர் தங்கிய இல்லம், ரோஜா முத்தையா நூலகம், அழகான கடற்கரை, சமாதிகள், ரயில் நிலையங்கள், காமராஜரை தவிர எல்லா முதல்வர்களையும் தமிழகத்திற்கு தந்த ஏ,வி.எம் ஸ்டூடியோ, போயஸ் கார்டன் நாடக பள்ளி என இன்னமும் ஏராள பெருமை கொண்டிருந்தாலும்

முதல் அடையாளம் அந்த கோட்டையே.

அந்த கோட்டை இன்று ராணுவத்திற்கு சொந்தமானது, தமிழக அரசிற்கு தனியாக தலமைசெயலகம் வேண்டும் என்று கலைஞர் ஒரு கட்டடம் கட்டினார், ஆயிரம் சர்சைகள் இருந்தாலும் கட்டடம் அமைப்பதிலும், சிலைகள் அமைப்பதிலும் கலைஞர் எடுத்துகொள்ளும் முயற்சி வியப்புக்குறியது, அது பாஞ்சாலங்குறிச்சி கோட்டையோ?, வள்ளுவர் கோட்டமோ? அல்லது சிலையோ? அவரின் அந்த அக்கறை பாராட்டதக்கது.

காலமாற்றமோ அல்லது ஏதும் நிர்பந்தமோ மாமல்லபுரம் கடற்கரை கோயில் போல ஒரு அழகான கட்டடம் நவீன மாடலில் அமைப்பார் என எதிர்பார்த்திருந்த பொழுதுதான் இந்தியன் ஆயில் எண்ணெய் குடோன் மாடலில் ஒன்றை கட்டினார்கள், உறுதியாக அவர் முழுமனதோடு அதனை ஏற்றிருக்கமாட்டார், அவரின் ரசனை அப்படி அல்ல.

அதுதான் இனி தமிழக தலையெழுத்தினை நிர்ணயிக்கும் பாற்கடல் என தமிழக மக்கள் நினைக்க ஆட்சி மாறியது, முன்னாள் எதிர்கட்சி என்றாலும் எதிராகத்தான் செய்யவேண்டும் என்பதல்ல அதிரடியாகவும் செய்யலாம், மறுபடியும் சென்னை கோட்டை இழந்த ஆட்சிபீடத்தினை பெற்றது.

அங்கு தமிழத்திற்கான திட்டங்களை எப்படி தீட்டுகின்றனர் என தெரியவில்லை, கொஞ்ச நாளைக்கு முன்பாவது ஆட்சி மிக‌ நன்றாக நடக்கிறது என தெரியவேண்டுமானால் ஜெயா டிவி பார்க்கலாம், பெரும் ஜனநாயக படுகொலை நடக்கிறது என்று பார்க்கவேண்டுமானால் சன் டிவி, மக்கள் டிவி பார்க்கலாம்.

இன்று ஜெயா டிவியும் தமிழக ஆட்சி சரியில்லை என புலம்புகின்றது, ஆக எல்லா டிவியும் கரித்துகொட்டும் ஒரு ஆட்சி நடக்கின்றது

இன்று திருவிழா கொண்டாடும் தமிழக தலைநகர மக்களுக்கு நமது வாழ்த்துக்களை தெரிவிப்போம், வெளிநாடுகளில் ஒருவன் தமிழரென்றால் அவர்கள் கேட்கும் கேள்வியே “உனக்கு சென்னையா?” என்பதுதான்.

இது நல்ல துறைமுகம் என கண்ட போர்த்துகீசியரும், கோட்டை அமைத்து சென்னைக்கு அடிகோலிய பிரிட்டிசாரும், அதனை குறிப்பிட்ட இடமாக மாற்றிய ராபர்ட்கிளைவும் (கிளைவின் திருமணம் சென்னை கோட்டையில்தான் நடந்தது), அதனை மாதிரி நகரமாக திட்டமிட்டு கொடுத்த லார்டு ரிப்பனும், பின்னாளில் அதனை தமிழரின் தலைநகராக மாற்றி தந்த ம.பொ.சியும் ஏனோ மனதில் வந்து வந்து போகின்றார்கள்.

(உண்மையில் முதலில் சென்னையினை காத்தவன் ராபர்ட் கிளைவ், அவன் இல்லாவிட்டால் சென்னை பிரெஞ்ச்காரன் வசம் ஆகியிருக்கும்

பாண்டிச்சேரி, கோவா போல ஒரு மாதிரி ஊராக அது மாறியிருக்கும், கிளைவ் அதனை காத்தான்)

இவர்கள் இல்லாவிட்டால் தமிழகத்தில் சென்னையோ, இல்லை சென்னையில் தமிழர்களோ ஏது??

எல்லாவற்றையும் விட மகா முக்கியமான பெருமையினை சென்னை பெற்றிருக்கின்றது, உலகின் எந்த நகருக்கும் இல்லா சிறப்பு அது.

ஆம் அங்குதான் குஷ்பூ வசித்துகொண்டிருக்கின்றார்.

அவ்வகையில் கிளியோபாட்ரா வாழ்ந்த அலெக்ஸாண்டிரியாவிற்கு அடுத்து பெரும் புகழ்பெற்றது குஷ்பூ வாழும் சென்னை, வரலாறு அப்படித்தான் குறித்துகொண்டது.

பிரிட்டன் ராணி மகுடம் கோஹினூர் வைரம் பதிக்கபட்டு பெருமை பெற்றது போல குஷ்புவினால் சென்னை பெரும் பெருமை பெற்றது

சென்னை வாழ் மக்கள் அனைவருக்கும் இனிய சென்னை நாள் நல்வாழ்த்துக்கள்.

வட இலங்கை தமிழர்கள் இலங்கை அமைச்சரிடம் மனு

இந்த வட இலங்கை தமிழர்கள் குறிப்பாக மீணவர்கள் இலங்கை அமைச்சரிடம் ஒரு மனுவினை கொடுத்திருக்கின்றார்கள்

என்ன மனு?

“இந்திய மீணவர்களான இந்திய தமிழ் மீணவர்கள் நம் பகுதியில் வந்து இன்னமும் மீன்பிடித்து எம் தொழிலை கெடுக்கின்றார்கள், இந்த படகை பிடித்து வைத்தல், சிறை வைத்தல் எல்லாம் போதாது , இன்னும் கடுமையாக நடவடிக்கை வேண்டும்..” என கடுமையான வார்த்தைகளை சொல்லி இருக்கின்றார்கள்

இலங்கை அமைச்சரான அந்த சிங்கள விஜயமுனி என்பவர் பொறுப்பான பதிலை சொல்லியிருக்கின்றார்

இந்தியா நமக்கு நிறைய உதவிகளை செய்கின்றது, துறைமுகங்களை எல்லாம் கட்டி தருகின்றது

ஏன்? உங்கள் இந்துமதமும் எங்கள் புனிதமான புத்தமதமும் அங்கிருந்துதான் இலங்கைக்கு வந்தது, அவர்களை எப்படி பகைக்க முடியும்?

கவனியுங்கள், இந்திய மீணவர்களை பிடித்து உதையுங்கள் என மனுகொடுக்க போனது தொப்புள் கொடி உறவுகள்

ஆனால் இந்தியா நட்புநாடு அவர்களை பகைக்கமாட்டோம் என சொல்பவன் சிங்களன்

புரிய முடிந்தவர்கள் புரிந்துகொள்ளுங்கள்

துருக்கிக்கும் அமெரிக்காவிற்கும் மோதல் முற்றுகின்றது

துருக்கிக்கும் அமெரிக்காவிற்கும் மோதல் முற்றுகின்றது

அதாகபட்டது ஏற்கனவே முறுகலில் இருந்த துருக்கி அமெரிக்க உறவு இன்னும் மகா மோசமாகின்றது

ஆயிரம் காரணம் இருந்தாலும் இப்பொழுது அவர்கள் மோதிகொள்ளும் காரணம் இரண்டு

முதலாவது காரணம் துருக்கி இஸ்லாமிய நாடு ஆயினும் கிறிஸ்தவ அடையாளங்கள் அங்கு நிரம்ப உண்டு, அப்போஸ்தலர் பணி எனும் பைபிளின் அதிகாரம் சொல்லும் 7 சபைகள் அங்குதான் இருந்தன‌

எபேசு பட்டினம் இன்னபிற பட்டினம் எல்லாம் அங்குதான் இருந்தது, இதனால் கிறிஸ்தவர்களுக்கு அது வாடிகன் , ஜெருசலேம் போலவே ஒரு புண்ணிய பூமி

அதுவரை அந்த இடங்களை மீட்க வேண்டும் என்ற குரல் வரும் போகும், ஆனால் அதிர்வு இருக்காது

இப்பொழுது டிரம்ப் அப்படிபட்ட கிறிஸ்தவ பாதிரி ஒருவரை அமெரிக்காவில் அடைக்கலம் கொடுத்து துருக்கிக்கு எதிராக பேச வைக்கின்றார், துருக்கி அவரை ஒப்படைக்குமாறு கேட்கின்றது, டிரம்ப் மறுக்கின்றார்

அடுத்த காரணம் துருக்கி நேட்டோ அமைப்பில் இடம்பெற்றுள்ள இஸ்லாமிய நாடு, நேட்டோ நாடுகளுக்கு துருக்கி இருக்க வேண்டுமே தவிர வலுவான துருக்கி அதிபர் இருக்க கூடாது

ஆனால் எர்டோகன் என்பவர் இரும்பு தலைவராக புட்டீன் போல அமர்ந்துவிட்டார், அவருக்கு எதிராக அமெரிக்கா கொண்டுவந்த ராணுவபுரட்சியும் தொல்வி

இப்படி பல காரணங்களுக்காக தொடங்கிய முறுகல் பொருளாதார தடைவரை சென்று துருக்கி நாணய மதிப்பும் சரிந்தது

பதிலுக்கு துருக்கி அமெரிக்க பொருட்களை விரட்டியது, சில பொருட்களுக்கு கடும் வரி விதித்தது

இந்நிலையில் துருக்கியில் உள்ள அமெரிக்க தூதரகம் துப்பாக்கி சுட்டுக்கு இலக்காகியுள்ளது

இது துருக்கி சதி என அமெரிக்காவும், பக்ரித் பண்டிகையினை கெடுத்து கலவரம் ஏற்பட அமெரிக்காவே செய்த சதி என துருக்கியும் குற்றம்சாட்டி வருகின்றது

ஈரான் போல துருக்கியும் சுத்தமாக அமெரிக்க தொடர்புகளை முறிக்கும் நேரம் நெருங்குவது போல் தெரிகின்றது

அமெரிக்கா சும்மா விடுமா?

சிரியாவிலும் அமைதி திரும்பிவிட்டது, துருக்கியும் வாலாட்டுகின்றது

இரு நாடுகளுக்கும் தலைவலி ஏற்படுத்தும் விவகாரம் ஒன்றை கிளப்பிவிட்டால் அடுத்த ஆட்டத்தை அமெரிக்கா ஆரம்பிக்கலாம்

அது குர்து விவகாரம், அதை கிளப்பினால் துருக்கி நிச்சயம் சீறும், சிரிய பதறும்

தனக்கு அனுகூலம் ஏற்பட எத்தனை லட்சம் மக்கள் செத்தாலும் கவலைபடாத நாடு அமெரிக்கா

அடுத்து எதுவும் நடக்கலாம்