மொகரம்

உலகெல்லாம் வாழும் கலாச்சார பிண்ணனி கொண்ட இனங்களுக்கு எல்லாம் நாள்காட்டிகள் உண்டு, அதில் தமிழகம் தமிழ்வருடம் பிறப்பது சித்திரையா அல்லது தையா என தைதை என குதிப்பதும் உண்டு.

இஸ்லாமிய காலண்டர் படி மொகரம் ஆண்டின் முதல் மாதம் , அந்த 1ம் தேதியே இஸ்லாமிய பெருமக்கள் பின்பற்றும் நாள்காட்டியின் வருடபிறப்பு.

அதாவது நபிபெருமகனாரின் போதனைகளுக்கு பின்னராக கால கட்டத்தில் இஸ்லாமிய மக்களுக்கான நாள்காட்டி வகுக்கபட்டது, அதன் படி ஹிஜ்ரி வருடகணக்கினை அவர்கள் பின்பற்றி வருகின்றார்கள்.

எப்படி போப் கிரகோரி அறிவித்த காலண்டர் (ஜனவரி ‍டிசம்பர்) ஐரோப்பாவில் நடைமுறைபடுத்தபட்டதோ( பின் உலகம் முழுக்க பரவிவிட்டது) , அவ்வாறே இது அக்கால இஸ்லாமிய தலமையால் அவர்களுக்கென கொடுக்கபட்டது.

வருடத்தின் முதல்மாதம் மட்டுமல்ல, அது இஸ்லாமியருக்கு மாதங்களுள் ரமலானை போல மிக சிறந்த மாதம். அதன் சிறப்புக்கள் மகா உயர்வானவை.

அதாவது யூத மத பூர்வீகமும், இஸ்லாமிய வேர்களும் ஒரே மாதிரியானவை. முதல் மனிதன் ஆதாம் படைக்கபட்டது , அவரில் இருந்து ஏவாள் படைக்கபட்டது . பின் ஊழிவெள்ளத்தில் நூஹ் (நோவா) அவர்கள் அந்த கப்பலிருந்து வெள்ளம் வடிந்தபின் பூமியில் இறங்கியது எல்லாம் இம்மாதத்தில் என்பது அவர்கள் நம்பிக்கை

எகிபதிலிருந்து மூசா (பைபிளின் மோசஸ்) அடிமை மக்களை மீட்டது, அதனை தடுத்த பார்வோன் மன்னன் படைகளோடு செங்கடலில் மூழ்கியது, இப்ராஹிம் அவர்களுக்கு சில அதிசயங்கள் நடந்தது, மாமனன்ன தாவூத் (தாவீது அல்லது டேவிட்) பாவத்தை கடவுள் மன்னித்தது, மாமன்னன் சுலைமான் (சாலமோன்) இடையில் தவறவிட்ட ஆட்சியை கடவுள் மறுபடியும் கொடுத்தது என பட்டியல் நீண்டது.

உச்சமாக ஈசா நபி (இயேசு கிறிஸ்து) பரலோகம் சென்றதும் இம்மாதம் என்பதும் இம்மாதத்தின் மகா சிறப்புகள். கவனியுங்கள் எகிப்திலிருந்து அடிமை மக்களை மீட்ட யூத பண்டிகை பாஸ்கா, அன்றுதான் கிறிஸ்து சிலுவையில் அறையபட்டார் என்பது பைபிளின் அடிப்படை ஆதாரம்.

ஆனால் யூத மதம் சொல்லும் மாதம் வேறு, எனவே புனிதவெள்ளி மார்ச் மாதம் வரும்.

இப்படி பெரும் ஆச்சரியங்களை இறைவன் நிகழ்த்திய மொகரம் மாதம் நிச்சயம் மகா புனிதமானது, அதன்படி வருடபிறப்போடு இம்மாதத்தின் புனிதத்துவதை இஸ்லாமிய பெருமக்கள் நினைவுகூர்வார்கள், குறிப்பாக 9 மற்றும் 10ம் நாள் மகா சிறப்பு வாய்ந்தவை. எகிப்தில் கடவுள் செய்த கருணைக்காக நோன்பு இருப்பார்கள், மூசா நபி காலத்தில் தொடங்கபட்ட நோன்பு அது.

இப்படியான மொகரம் இஸ்லாமியரின் ஒரு பிரிவிற்கு, அதாவது ஷியா பிரிவினருக்கு மகாதுயரம் ஆகியும் போனது.

நபிகள் நாயகம் போதிக்க தொடங்கிய காலத்தில் அவருக்கு எதிர்ப்புகள் அதிகம், ஆனால் போகபோக அவரின் போதனையினை ஏற்று இனிய மார்க்க பூமியாக அரேபியா மாறிற்று, ஆனால் பின்னரான காலதில் சில சர்சைகள் தோன்றின.

சர்சைகள் உலகின் எல்லா மதத்திலும் உண்டு, ஒரே இந்துமதம்தான் ஆனால் சைவ வைணவ மோதலில் ஓடிய ரத்த ஆறு மிக பெரிது, ஒரே புத்தமதம்தான் ஆனால் ஹீனயானம் மகாயாணம் பிரிவுகளின் மோதல்கள் அதிகம். சமண மதத்தில் திகேம்பரர், சுவேதம்பர மோதல் பிரசித்தி பெற்றது,

யூதரில் கூட இன்றும் உட்கட்சி பூசல்கள் அதிகம் (ஆனால் வெளிகாட்டமாட்டார்கள்), இயேசு காலத்தில் அவரே கண்டித்த யூத பிரிவினைகள் உண்டு.

கிறிஸ்தவம் கத்தோலிக்கம் மற்றும் பிரிவினை சபைகளுக்கான‌ மோதல், அதிலும் பிரிவினை சபைகளுக்குள் சிரிய யுத்தம்போல மகா குழப்பம், யார் யாருடன் மோதுகின்றர்கள் என தெரியாது ஆனால் கிறிஸ்தவர்கள்.

அப்படி சன்னி மற்றும் ஷியா என இஸ்லாமிலும் சர்ச்சைகள் வந்தன, வலுத்தன. முகமது நபிபெருமான் பேரன் ஹூசைன் அவர்கள் சில காரியங்களுக்காக ஒரு ஊருக்கு செல்லும்பொழுது வழியில் கர்பாலா எனும் பட்டிணத்தில் போரை சந்தித்தார்.

கரோ என்றால் அம்மொழியில் செங்கல் சூளை என பொருள். பாபில் எனும் பெரும் ஊரின்(இன்றைய பழைய பாக்தாத்) அருகில் இருந்ததால் கரோ+பாபில் என அழைக்கபட்டு பின் கர்பாலா ஆகிற்று,

பைபிளை கையிலும், கண்களை வானத்திலும் வைத்துகொண்டிருக்கும் கிறிஸ்தவர்களுக்கு தெரியும், ஆதியில் மனிதர்கள் செங்கற்களால் கோபுரம் கட்டி வானகம் ஏற முயன்ற இடம் ஒன்று உண்டு. அக்கால கடவுள் கொஞ்சம் பொல்லாதவர், மனிதன் அறிவுபழம் தின்றால் பொறுக்காது, கோபுரம் கட்டி தன்னிடம் வரமுயன்றாலும் பொறுக்காது, அவர் அப்படித்தான்.

உடனே மொழிகளை உருவாக்கி மனிதனை அந்த இடத்தில் குழப்பினார், மனிதர் ஒருவர் பேசுவது ஒருவருக்கு புரியாமல் விழித்தனர், அதாவது தமிழக அரசியல்வாதிகள் போல் பேசிக்கொண்டிருந்தனர்.

அந்த கோபுர திட்டம் தோல்விஅடைந்து, மனிதர் கூட்டம் கூட்டமாக சிதறினர் என்கிறது பைபிள், அந்த இடம் இதுவாக இருக்கலாம் என்பது சில ஆராய்சியாளர்கள் கருத்து.

அந்த கர்பாலா நகரில் நடந்த யுத்தத்தில் நபிபெருமானின் பேரன் அவர்கள் கொடூரமாக கொல்லபட்டார், அப்பெருமகானாரின் சமாதி இன்றும் அங்கு உண்டு, ஷியா இஸ்லாமியரின் மிகபுனிதமான இடம் அது. சுருக்கமாக சொன்னால் ஷியாவினருக்கு மெக்காவிற்கு அடுத்த புனித இடம் கர்பாலா.

எத்தனை சன்னி அரசுகள் ஈராக்கினை ஆண்டாலும்,கர்பாலா நகருக்கு கொடுக்கபடும் முக்கியத்துவம் மிகபெரிது, இன்றும் அப்படியே. உலகெல்லாம் இருந்து ஷியா இஸ்லாமியர் ஓடிவரும் தலம் அது.

அந்த பெருமகனார் இறந்த மொகரம் 10ம் நாள், உலகெங்கும் ஷியாக்கள் தங்களை காயபடுத்தி ஊர்வலம் செல்வார்கள், தமிழகத்தின் சில இடங்களில் கூட அது உண்டு. இது இஸ்லாமியரின் ஷியா தவிர வேறுயாரும் செய்வதில்லை.

ஆனாலும் ஒரு வினோதம் என்னவென்றால், கிறிஸ்தவம் என்பது யூதர் அறவே விரும்பாத‌ மத தொடர்ச்சி, கிறிதவர்கள் பழைய ஏற்பாடினை படிப்பார்கள், அந்த வசனங்கள கார்,பைக்,வீட்டு சுவர் முதல் கண்ணில் படும் மண்கட்டை சுவர் வரை எழுதிவைப்பார்கள்.

ஆனால் ஆபிரகாமை கடவுள் அழைத்த நாள், கடவுள் கொடுத்த மற்ற சட்டங்கள், மற்ற உணவு கட்டளைகள், சமூக கட்டளைகள் (10 கட்டளை தவிர) மோசே செங்கடலை கடந்தநாள், அந்த மகா முக்கியமான‌ பாஸ்கா பண்டிகை, முதல் சாலமோன் ஆலய நாள், என ஒன்றையும் நினைத்து பார்க்கமாட்டார்கள், நிச்சயம் அந்த பாஸ்கா மகா முக்கியமானது, இப்படி எல்லாவற்றையும் விட்டுவிடுவார்கள்.

ஆனால் பழைய ஏற்பாடு படி போதகருக்கு அல்லது சபைக்கு பத்தில் ஒரு பாகம் காணிக்கை என்பதில் மட்டும் கண்ணும் கருத்துமாக இருப்பார்கள்.

பாஸ்கா என்றால் இயேசு நினைவுக்கு வருவார், அழுவார்கள். அதாவது பெரும் பழைய ஏற்பாடு வரலாற்று நிகழ்வுகளை இயேசுவின் மரணம் என்ற ஒற்றை துயரம் அந்நாளில் மூழ்கடித்துவிடுகின்றது.

அப்படியே ஷியா பிரிவினருக்கு இஸ்லாம் முறைப்படி மொகரம் மாதம் பெரும் சிறப்பு மிக்கது என்றாலும், மொகரம் 10ம் நாள் அவர்கள் மிகவும் நேசித்த ஹூசன் அவர்களின் மரணத்தின் துயரமே மிஞ்சி நிற்கின்றது.

ஆனால் வருடபிறப்பு எல்லா இஸ்லாமியருக்கும் பொதுவானது.

சகல இஸ்லாமிய நண்பர்களுக்கும் இனிய வருடபிறப்பு நல்வாழ்த்துக்களை தெரிவிப்போம்.

வல்ல இறைவன் எல்லோருக்கும் அமைதியும்,வளமும்,ஆரோக்கியமும் அருளட்டும். உலகம் அமைதியில் செழிக்கட்டும்.

Image may contain: night and sky
Advertisements

மகாகவி சுப்பிரமணிய பாரதி ஒரு பிறவி ஞானி

செப்டம்பர் மாதத்தில் இஸ்ரேலியருக்கு பெரும் துக்கம் உண்டு, முனிச் நகரத்தில் நடைபெற்ற துயரமது. அமெரிக்கர்களுக்கு பெரும் அடியாக அமைந்த இரட்டை கோபுரத்தினை எண்ணி அவர்களும் அழுவார்கள்.

நெல்லை சீமையின் அறிவுசுடர் பாரதியை நினைத்து தமிழறிந்த,அறிவறிந்த தமிழரும் அழுவார்கள்.

மகாகவி சுப்பிரமணிய பாரதி ஒரு பிறவி ஞானி, பாட்டுகொரு தலைமகன் என பட்டம் பெறமட்டுமே பிறந்தவர்,

தென் தமிழகத்தின் பெருமையான‌ அடையாளம், நிச்சயமாக சொல்லலாம் அறிவுசூரியன்.

ஆனால் வாழும்பொழுது ஒருவனை ஓடஓட விரட்டி, செத்த பின்னால் சிலைவைத்து வணங்கும் உயர்ந்த அறிவுகொண்ட தமிழ்சமூகத்தில் பிறந்ததுதான் அவன் தவறு, அதில் அவன் தவறு என்ன இருக்கிறது? விதி.

6 வயதில் கவிதை எழுதினார், நெல்லையில்தான் தமிழை கற்றார், பின்னர் காசியில் கல்வியோடு மொத்த உலகத்தையும் படித்தார், ஆங்கிலம், பிரென்ஞ்,சமஸ்கிருதம்,வங்கம் என பலமொழிகளை படித்ததனால் தான் திமிராக சொன்னார்

“யாமறிந்த மொழிகளிலே தமிழ்மொழிபோல் இனிமையானதை காணோம்”,

உண்மைதான்
பல ஊர்களில் தண்ணீர் குடித்தால்தான் சுவையான நீர் எது என்று தெரியும், அவருக்கு தெரிந்தது.

தமிழை கற்றார் தமிழ்கவிதைக்கு தலைகீழ் திருப்பம் கொடுத்தார், அருட்சகோதரி நிவேதிதாவை கல்கத்தாவில் கண்டார் உண்மை உணர்ந்து பெண்விடுதலைக்கு தமிழகத்தில் முதல் குரல் கொடுத்தார், சமூக அவலங்களை கண்டார் சமூகவாதியானார், பிரிட்டிசாரின் கொடுமையை கண்டார் போராளியானார்.

எந்த வம்புதும்புக்கும் போகாமல் எழுதிமட்டும் கொண்டிருந்தால் தாகூரை விட பெரும் கவிஞனாக கொண்டாடபட்டிருப்பார்

ஆங்கிலேயனை ஆதரித்திருந்தால் இன்று பெரும் பணக்கார கவிஞனாக வரலாற்றில் இருந்திருப்பான் இங்கல்ல லண்டனில், அவரது ஆங்கிலபுலமை அப்படி.
ஏன் எட்டயபுர மன்னரை புகழ்ந்து ஒரு நாளைக்கு 2 பாடல் எழுதியிருந்தால் இன்று பாரதியின் வம்சம் 4 மில்களோடு நெல்லையை அல்லது தூத்துகுடியினை ஆண்டுகொண்டிருக்கும்.

அவ்வளவு ஏன் ஆசிரியபணியினை ஒழுங்காக செய்தால் கூட ராதாகிருஷ்ணன் அளவிற்கு உயர்ந்திருப்பான்,
அந்த பத்திரிகையாவது ஒழுங்காக நடத்தினால் இன்று அது தொலைகாட்சி நடத்தும் அளவிற்கு பெரும் ஊடகமாக வளர்ந்திருக்கும்.

அப்பாவி சுப்பிரமணிய பாரதி இவற்றை எல்லாம் எப்படி தவறவிட்டார் என்றால் இரண்டே காரணம்தான் ஒன்று இந்த நாட்டை தீவிரமாக நேசித்தது, இன்னொன்று சமூக கொடுமைகளை கண்டித்து உண்மையை உரக்க சொன்னது.

முதலாவது ஆட்சியாளர்களின் கோபத்தை கிளறியது, இன்னொன்று சொந்த மக்கள் பாரதியை விரட்ட வைத்தது.
வளைந்தும், நெளிந்தும், கெஞ்சியும், கொஞ்சியும்,மிரட்டியும், விரட்டியும் வாழவேண்டிய சமூகத்தில் அவர் மட்டும் மனிதனாக வாழ்ந்தார், மனித நேயத்தோடு வாழ்ந்தார்.

உண்மையில் பராசக்தி வசனம் அவருக்குதான் பொருந்தும்,

பிரிட்டிசார் விரட்டினர் ஓடினார், வறுமை விரட்டியது ஓடினார், சமூக கொடுமைகள் விரட்டியது ஓடினார்,ஓடினார் முடிந்தவரை ஓடினார், முடியவில்லை இறந்தார்.

ஒரு மனிதனுக்கு தாங்கமுடியாத அவமானம் என்பது அவனது திறமையை பரிகாசிப்பது, அதற்கு அங்கீகாரம் தர மறுப்பது, ஒரு வகையில் அது ஒரு உளவியல் கொலை,

அதைத்தான் அந்த சமூகம் பாரதிக்கு செயதது, பாவம் அவன் “நல்லதோர் வீணை செய்தே” என அவனால் தெய்வத்திடம் புலம்பத்தான் முடிந்தது, “சக்திகொடு” என கெஞ்சத்தான் முடிந்தது,

அவனுக்கிருந்த அறிவிற்கு அவனோடு சமமாக பேசகூட யாருமில்லை, ஒதுக்கினார்கள்,விரட்டினார்கள் அவன் கவிதையோடும், கடவுளோடும், பறவையோடும், கழுதையோடும் பேசிக்கொண்டிருந்தான் அந்தோ பரிதாபம்.

அங்குமிங்கும் ஓடினான், இந்த சமூகத்தில் தனக்கான இடத்தை பிடிக்கலாம் என நம்பினான், முடியவில்லை.

உலகிலே மிக கொடுமையான ஒரு விஷயம் உண்டென்றால் ஒரு அறிவாளியினை 10 முட்டாள்களோடு வாழவிடுவது அதுதான் பாரதிக்கும் நடந்தது.

குடும்பமும் வறுமையும் அவனை பணம் சம்பாதிக்க கட்டாயபடுத்தின, கண்ணனை நினைத்து பாடி மகிழ்ந்து கொண்டிருந்த காலமது, அப்பொழுதும் பாரதபோரையும் இந்திய சுதந்திரத்தினையும் தொடர்புபடுத்தி பாஞ்சாலி சபதம்தான் எழுத துணிந்தான். கொடும் துன்பங்கள் அவருக்கு உண்மையை உணர்த்திற்று,

கனவு வேறு,கடமை வேறு, வாழ்க்கைவேறு, இதனை உணர்த்தியது அவரது தோழரான‌வ.உ.சியின் சிறைகொடுமையும், சுப்பிரமணிய சிவாவின் கொடுமையான இறுதிகாலமும்
விளைவு ஒரு பெரும் கவிஞன், பன்மொழி ஆசிரியன், பெரும் காவியங்களை படைக்கும் ஆற்றல் உள்ளவன் ஒரு சாதாரண பத்திரிகையாளன் ஆனார்,

விறகு பொறுக்க யானை, எலி வேட்டைக்கு சிங்கம், புல் புடுங்க புல்டோசர் போல ஆனது நிலை.

இறுதிகாலத்தில் பித்துபிடித்தவர் என்றும், வாழதெரியாதவர் என்றும் புறக்கணிக்கபட்டவர், அப்போதும் ஏதோ எழுதிகொண்டிருந்தார், அப்பொழுது எழுதியவைதான் சாகாவரம் பெற்ற தேசபக்தி பாடல்களும், இன்னும் பல அழியா பாடல்களும்.

ஒன்று நிச்சயமாக சொல்லலாம், இந்தியாவின் தேசியகீதமாக்குவதற்கு அவரது பாடல்களை தவிர நிச்சயமாக எக்காலத்திலும் வேறுபாடல்களில்லை,
ஆனால் இந்திய இலக்கிய உலகம் வங்காளிகள் கையில் இருந்தது, எளிதாக தாகூரின் பாடலை தேசிய கீதம் ஆக்கினார்கள், எந்த பாடல் 1911ல் ஜார்ஜ் மன்னருக்காக‌ தாகூர் எழுதியதாக சர்சையில் சிக்கிய‌ அதே பாடல், “ஜண கண மன” எனும் அந்த பெரிய பாடல்

அன்று தாகூர் எழுதியது மிக பெரும் பாடல், அதை பாடி அரைமணி நேரம் கச்சேரி செய்யலாம், அதனை 5 நிமிடமாக சுருக்கி “இந்திய தேசிய கீதம்” என அறிவித்துவிட்டார்கள், என்ன செய்வது, பாடித்தான் ஆகவேண்டும். பாடுகின்றோம்

இந்தியாவில் இல்லாத சிந்து, (பிரிந்த) பஞ்சாபையும்,
வங்கதேசம் ஆகிவிட்ட வங்கத்தையும் சேர்த்து. சிந்துவை இன்னமும் வாழ்த்திகொண்டிருக்கின்றோம், ஆனால் அதன் கரையிலேதான் இந்தியாவினை அழித்தொழிக்க திட்டம் தீட்டபட்டுகொண்டிருக்கின்றது என்ன கொடுமை இது.

ஆனால் “தாயின் மணிக்கொடிபாரீர்” அல்லது “வந்தே மாதரம் என்போம்” போன்ற பாடல்களில் சிறிது மாற்றம் செய்துபாருங்கள், அற்புதமான தேசிய பாடல்கள் கிடைக்கும்.

ஒன்றும் சொல்வதற்கில்லை ,”ஏழை சொல் அம்பலம் ஏறாது, தமிழன் சொல் டெல்லிக்கு கேளாது”.

தாகூருக்கு வெள்ளையர் கொடுத்த பெரும் வெகுமதி பின்னாளைய “நோபல் பரிசு”, பாரதியோ வெள்ளையர் விரோதியாய் பாண்டிச்சேரியில் “ஆடுவோமே பள்ளு பாடுவோமே” என பாடிகொண்டிருந்தார், அவருக்கு வெள்ளையன் கொடுத்தது “தேச துரோகி” பட்டமும் சிறைதண்டனையும்.

பாரதி இந்தியாவினை எவ்வளவு நேசித்தார் அல்லது இந்தியா பற்றி அவரின் கனவு என்ன? என்பதற்கு அவரின் பாடல்களே சாட்சி, தாகூர் சிறந்த கவிஞர்தான் ஆனால் பாரதியின் “கணல்” அல்லது “உணர்ச்சி” அவர் பாடலில் இல்லை.

இந்தியா தேசிய கீதமாக நிச்சயம் பாரதியின் பாடலே இடம் பெற்றிருக்கவேண்டும், இந்தியாவில் எதுதான் ஒழுங்காக நடந்தது? ஆனால் பாரதியின் ஒரே ஒரு வரியினை மட்டும் டெல்லி மிக ஒழுங்காக பின்பற்றி அவரது கனவினை நிச்சயம் நனவாக்கும் என தோன்றுகிறது அது

“சிங்கள தீவினுக்கோர் பாலமைப்போம்
சேதுவை மேடுறுத்தி வீதி சமைப்போம்”,
இதில் மட்டும் டெல்லி பின்வாங்காது.

அவரது கனவுபடியே இந்தியா சுதந்திரம் பெற்றது, ஆனால் அவர் மிகவும் நேசித்த சிந்து நதி கூட இன்று இந்தியாவிற்கு இல்லை, பாரதி முன்னமே இறந்தார் இல்லை 1947ல் இறந்திருப்பார். எப்படியோ பெண்விடுதலைக்கும், தீண்டாமை கொடுமைக்கும், சாதி கொடுமைக்கும் எதிராக தீ வைக்க துணிந்தவர் பாரதி.

அவர் பாஷையில் சொல்வதென்றால் “அக்கினிக் குஞ்சொன்று கண்டேன், அதை அங்கொரு காட்டிலோர் பொந்திடை வைத்தேன் வெந்து தணிந்தது காடு”.
அவர் வைத்த அந்த‌ தீ தான், பின்னாளில் எழுந்து பல தமிழக சமூக மாற்றங்களுக்கு வழிவிட்டது.

பாரதியின் வாழ்க்கையே கொடுமையானது, அவராவ‌து அறிவாளி இந்த சமூகத்தோடு ஒட்டமுடியாமல் அவதிபட்டார் விதி, ஆனால் அவரை நம்பி வந்த மனைவியின் வாழ்வே மகா கொடுமை, வறுமையும் புலமையும் அந்நாளைய தமிழக அறிஞர்களின் சாபம்தான், ஆனால் பாரதியாரின் சில செயல்கள் எந்த மனைவியையும் அம்மிகுளவி தூக்கவைக்கும்.

வருமானம் இல்லை, கடன் வாங்கி அரிசி வாங்க பணம் கொடுத்தால் புத்தகம் வாங்குவது, பக்கத்து வீட்டில் கடனுக்கு அரிசியாக‌ வாங்கி வைத்தால் காக்கா குருவிக்கு வீசி கவிதைபாடுவது, உச்சகட்டமாக குடும்பமே பசியில் வாடினால் அவர் விழித்திருந்து அழுது கவிதை எழுதுவார், பிள்ளைகளுக்காய் அல்ல பிஜி தீவில் கரும்புகாட்டில் அவதிபடும் இந்தியருக்காக‌

உலகின் கஷ்டத்த்தினை எல்லாம் உணர்ந்த பாரதிக்கு மனைவியின் கஷ்டம் புரியவில்லை,புரியவும் புரியாது காரணம் அவர் மனநிலை அப்படி. இறுதியாக சென்னை திருவல்லிகேணியில் ஒரு வாடகை வீட்டில் ஒண்டுகுடித்தனம் நடத்தும்பொழுதும் பாரதி அப்படியே இருந்தார், சொந்த பந்தம் யாருமில்லாத அபலையாக செல்லம்மாள் அந்த கோயிலிலே அழுவார்.

கோயிலின் தெய்வம் கோபபடவில்லை, ஆனால் கோயில் யானை கோபபட்டது, வழக்கம்போல பழம்கொடுக்க “அப்பனே கணேசா..” என அருகில் சென்ற பாரதியை தூக்கிவீசிற்று. அன்று நோயில் விழுந்தவர் விரைவாக உடல்நலம் கெட்டு செப்டம்பர் 11ல் காலமானார்.

இன்று அவர் பெரும் கவிஞர், இனி எந்த கவிஞனும் பிடிக்க முடியாத இடத்திற்கு சொந்தகாரர், கம்பனுக்கு பின் தமிழகம் கண்ட பெரும் கவிஞன், எந்த உண்ர்ச்சியில் பாட்டெழுதுகின்றானோ அதே உணர்ச்சியை அந்த‌ பாடலை கேட்பவருக்குள்ளும் கொண்டுவரும் அனாசய வித்தைக்கு சொந்தகாரன். 60 வருடம் 100 வருடம் கழித்து போடபடும் இசைக்கும் கட்டுபடும் வரிகளை மிக அழகாக எழுதியிருப்பது தான் பாரதியின் பெரும் சிறப்பு.

ஆனால் வாழும் பொழுது அவருக்கு ஒரு செம்பு தண்ணீர் கொடுக்கவும் ஆளில்லை, பேச கூட விரும்பவில்லை, ஒரு அகதியாய், ஒரு அனாதயாய் விரட்டி விரட்டி கொத்தபட்ட ஒரு பரிதாபத்திற்குரிய அறிஞன்.

ஆனால் 38 ஆண்டுகள் வாழ்வதற்குள்ளாகவே வரலாற்றில் இடம்பெற்ற அறிஞன் அவர், தமிழ் இலக்கியம் உள்ள காலமட்டும் பாரதியார் வாழ்வார், அப்படி ஒரு சூரியனை கொடுத்தது என்பதற்காக நெல்லையின் மக்களான நாமும் பெருமை அடையலாம்.

தனது ஏதாவது ஒரு வரியில் பாரதி நிச்சயம் ஒவ்வொருவரின் உள்ளத்தையும் தொட்டிருப்பார், அந்த மகா கவிஞனுக்கு ஒரு தமிழனாய்,நெல்லையனாய் அஞ்சலி செலுத்துவோம்.

வாழும்பொழுது வெள்ளையனை எதிர்த்தவன் என்பதற்காக விரட்டபட்டான், சுதந்திர இந்தியாவின் தமிழகத்தில் பிராமணன் என்பதர்க்காக அவன் புகழ் திட்டமிட்டு மறைக்கபட்டது.

பாரதியினை கொண்டாடினால் அவனின் தேசபக்தியும், ஒருங்கிணைந்த இந்தியாவினையும் கொண்டாடவேண்டும் என்ற நோக்கில் அவன் திட்டமிட்டு மறைக்கபட்டான்,

தமிழ் பக்தரான பாரதிதாசன் கொண்டாடபட்டான்

இப்பொழுது தமிழகத்தில் பாஜக குரல் எழும்புகின்றது, அந்த பாஜகவினராவது அவனுக்கு கொடுக்கவேண்டிய மரியாதையினை கொடுக்கட்டும்

தமிழக பாஜகவினர் அவனுக்கு செய்வதாக இருந்தால் அவன் பாடல்களை இந்தியா முழுக்க கொண்டு செல்லலாம், வந்தே மாதரம் பாடலுக்கும், ஜனகணமன விற்கும் சற்றும் குறையாத பாடல் அவனுடையது.

தேசபக்தி என்றால் என்னவென்று வாழ்விலும் , பாடலிலும் சொல்லி சென்றவன் அவன். உண்மையான தேசபக்தி என்பது பாரதியிக்கு அஞ்சலி செலுத்துவதிலும் அவன் பாடாலை நாடெல்லாம் கொண்டு செல்வதிலும் இருக்கின்றது.

தாயின் மணிக்கொடி பாரீர் என்பதை விட மிக உருக்கமான தேசிய‌கொடி வாழ்த்து பாடலை எங்கு காணமுடியும்? வந்தே மாதரம் என்போம் என்பதை விட உணர்ச்சிமிக்க தேசிய பாடல் எங்கு இருக்கின்றது?

அவன் பாடல்களையும் தேசியமயமாக்க சொல்லலாம், எல்லா இந்தியனும் அதனை படிக்கலாம்

அதனை காங்கிரஸ் செய்யவில்லை, பாஜகவும் செய்யாவிட்டால் செய்வதற்கு யாருமில்லை

சுதந்திர இந்தியாவின் முதல் முறையாக கடந்த சுதந்திர தினத்தில் செங்கோட்டையில் பாரதியின் வரிகளை மேற்கோள் காட்டி பேசினார் மோடி

பாரதிக்கான மிகபெரும் அங்கிகாரம் அது, அது இன்னும் தொடரவேண்டும், பாரதி புகழ் இந்தியா எங்கும் பரவி நிலைக்க வேண்டும்

நலங்கெட அந்த வீணை புழுதியில் எறியபட்டாலும் அதன் இன்னிசை எந்நாளும் இந்நாட்டில் கேட்டுகொண்டே இருக்கும்

நாட்டிற்காகவும், இச்சமூகத்திற்காகவும் ஒலித்த வீனை அது

தமிழ்சமூகத்தின் அறிவுடை மகனுக்கு ஆழ்ந்த அஞ்சலிகள், மாபெரும் தேசபற்றாளனுக்கு “பாரத தேசமென்று பெயர் சொல்லுவார்..” என்ற அவரின் வரிகளுடன் வீர வணக்கம்

Image may contain: one or more people and people standing

2001 செப்டம்பர் 11 தாக்குதல்

2001 செப்டம்பர் 11 வழக்கம்போலத்தான் அமெரிக்காவில் விடிந்தது, அந்த 19 பேரும் காலை எழுந்து குளித்து பிரார்த்தித்து, டை எல்லாம் கட்டி ஏதோ பன்னாட்டு நிர்வாக கூட்டத்திற்கு செல்வது போலத்தான் சென்றார்கள்,

தமிழக பஸ்டாண்ட் மினிபஸ் போல அடிக்கடி பறக்கும் அமெரிக்க விமானங்களில் ஏறிகொண்டார்கள், காலை 8.30 மணிக்கு 4 விமானங்களில் குளறுபடி ஆரம்பித்தது, விமான நிலைய கட்டுபாட்டு அறையுடன் தகவல் அறுந்தது,
திடீரென் 9 மணிவாக்கில் உலக வர்த்தக மைய கட்டத்தின் உச்சியில் தீ எழும்பியது ஏதோ விபத்தாக கருதி செய்தியாளர்களும் குவிந்தனர், மீட்பு மற்றும் தீயணைக்கும் படையும் விரைந்தது,

(அந்நாளில் முகநூல் மற்றும் வாட்ஸஅப் எல்லாம் இல்லை, இருந்தால் இன்னமும் பலி எண்ணிக்கை கூடியிருக்கும்)

அப்பொழுதுதான் கண்டார்கள், ஒரு விமானம் மற்றொரு கட்டடத்தில் மோதியது, ஒரு கணம் திகைத்துதான் போனார்கள், புகை எழும்ப எழும்ப திகில் பரவிற்று, இதற்கிடையில் பெண்டகன் மீது ஒரு விமானம் மோதிற்று, உலக மாபெரும் ராணுவத்தின் தலமையகம், தாங்குமா?

மொத்த தேசமும் முதல்முறையாக கலங்கிற்று,

இன்னொரு விமானம் காணவில்லை, பாதுகாப்பு அதிகாரிகளுக்கு ஏதோ புரிந்தது, டெக்ஸாசில் இருந்த அதிபரை அவரசமாக அலாக்காக பிரத்யோக விமானத்தில் ஏற்றி 40,000 அடி உயரத்தில் நிறுத்தினார்கள், அதை தவிர எல்லா விமானமும் தரையிரக்கபட்டது, நியூ யார்க் முழுக்க புகை. 3000 பேர் உயிரிழந்தனர், அவை உயிர்கள் என்று சொல்வதை விட பொருளாதார மூளைகள், உலகின் பல பாகத்திலிருந்தும் அமெரிக்கா “வாங்கியிருந்த” சொத்துக்கள்.

4வது விமானம் எங்கும் தாக்காமல் தரையில் விழுந்தது, அதன் இலக்கு வெள்ளை மாளிகை அல்லது சி.ஐ.ஏ அலுவலகமாக இருக்கலாம். கொஞ்சம் அமைதி திரும்பியது மற்றபடி மகா பீதி, பெரும் பயம்.

உலகப்போர் முதல் உலகமூலைபோர் வரை நடத்திய நாடுதான் அமெரிக்கா, ஆபத்தை எதிர்நோக்கிய நாடுதான், அது ஏவுகனையோ அல்லது விமானதாக்குதலோ அல்லது நீர்மூழ்கி கப்பலோ என்றுதான் பாதுகாப்பினை செய்திருந்தார்கள்.ஆனால் இது யாரும் எதிர்பார்க்காத மரண அடி.

முப்படைகளும் முழு வீச்சில் தயாராயின, 40க்கும் மேலான செயற்கை கோள் அமெரிக்காவை கண்காணித்தது, புஷ் பத்திரமாக தரையிரக்கபட்டார், ஆனால் இந்த கொடூரத்தினை செய்தது யார் என்பது மட்டும் குழப்பம்.
காரணம் உலகிலே அமெரிக்காவிற்கு எதிரிகள் அதிகம், அணுகுண்டு தாக்குதலுக்கு ஜப்பானின் பதிலடி, வடகொரியா திட்டம், இல்லை இது ஈரானின் கைங்கரியம் என எல்லா எதிரிகளையும் போட்டு 2 நாளைக்கு குழம்பினார்கள்.

ஆனால் எப்பொழுது ஒருவருக்கொருவர் முறைக்கும் சி.ஐ.ஏ மற்றும் எப்.பி.ஐ ஆகிய இரு அமைப்புக்களும் ஒன்றாக களத்தில் குதித்தன, சத்தியமிட்டு சொன்னது இது அல்கய்தாவின் தாக்குதல், ஆனால் அவர்கள் மனதில் இருந்த பெயர் “இமாத் முக்கினியே”.

அந்த ஹிஸ்புல்லா நபர் சாதாரணமானவர் அல்ல, பல இடங்களில் அமெரிக்க விமானங்களை கடத்தி, பல கைதிகளை விடுவித்த சாகசக்காரர், போராளிகளிடம் பெரும் பெயர் பெற்றிருந்தவர்.

விமானம் கடத்தபட்டு தாக்குதல் என்றவுடன் அமெரிக்காவிற்கு ஹிஸ்புல்லாவின் அந்த சிங்கம்தான் அமெரிக்க மேஜையில் விவாதத்திற்கு வந்தது.

ஒரு விஷயம் பாராட்டதக்கது, பின்பற்றதக்கதும் கூட அவ்வளவு பெரிய இழப்பிலும் அமெரிக்கர்கள் அமைதிகாத்தனர்.

ஒருவர் கூட ஜார்ஜ்புஷ்ஷை “பதவி விலகு” என்றோ, “ஓடிப்போ” என்றோ முணகல் கூட இல்லை, எதிர்கட்சி கிளிண்டன் ஓடிவந்து சொன்னார் “பின்லேடனை கொல்ல தவறியது நான்தான், மக்களே மன்னித்துகொள்ளுங்கள்”.

ஒரு பத்திரிகை கூட , ஒரு மீடியா கூட தவறாக ஒருவார்த்தை எழுதவில்லை, தேச ஒற்றுமை என்றால் என்ன என்பதை அட்டகாசமாக உலகிற்கு காட்டினார்கள்.
இம்மாதிரி காலங்களில் வதந்தி இறக்கை கட்டி பறக்கும், பத்திரிகையில் மாய்ந்து மாய்ந்து எழுதுவார்கள்.

ராஜிவ் கொலையில் கூட தமிழகத்தில் எழுதினார்கள். பூகூடையில் குண்டு இருந்தது, கூடைக்குள் எட்டிபார்த்தது யார்? சொல்லமாட்டார்கள். ராஜிவின் பின்புறம் இருந்து முன்புறம் குண்டு வீசினார்கள் என்பதும் செய்தி, அந்த காட்சியை கண்டது யார்? அதெல்லாம் தேவையே இல்லை. ராஜிவ் வரும் பாதையில் குண்டு வைத்தார்கள், கடப்பாரை கொடுத்து குழிதோண்டியவர் யார்? சொல்லமாட்டார்கள், அவர்களாக எழுதுவார்கள், அது உண்மையா? என்றெல்லாம் கவலை இல்லை.

ஆனால் அமெரிக்க ஊடகங்கள் பொறுப்புடன் நடந்துகொண்டது, அல்கய்தாவின் பெயர் வந்த பொழுதும் ஒரு கலவரம் கூட நடக்கவில்லை,நிறைய இஸ்லாமியர் வாழும் நாடுதான், ஆனால் அமைதி, அமைதி, சர்வ அமைதி, ஆனால் அடுத்து செய்யவேண்டிய அவசரவேலைகள்.

இங்கோ இந்திய பத்திரிககைகள் போட்டு தாக்கின, அமெரிக்காவே எரிகின்றது என்றது ஒரு பத்திரிகை, எங்கிருந்து எங்கு வரை எரிகிறது என்று மட்டும் சொல்லவில்லை. இனி அமெரிக்கா முடிந்தது என்றது இன்னொன்று இரு கட்டத்தில்தான் மொத்த அமெரிக்காவும் இருந்ததாக அது நினைத்துகொண்டது,

இன்னொன்று இங்கிருந்தே புலனாய்வு செய்து சொன்னது, விமானத்தை கடத்தி 2 டன் வெடிமருந்தை ஏற்றி மறுபடியும் பறந்து மோதினர், இவ்வாறாக பல பல ஹேஸ்யங்கள்.

யானைக்கும் அடிசறுக்கும், கழுகுக்கும் குறி தவறும், நிச்சயமாக பெருத்த அடிதான், ஆனால் கொஞ்சம் கூட அசரவில்லை அமெரிக்கா, பொதுவாக அமெரிக்க அதிபர் உலகவிவகாரங்களைத்தானே கவனிப்பார், அவருக்காக பெரும் அறிக்கை தயாரிக்கபட்டது, உள்துறை உளவுதுறை எல்லா துறைகளும் சேர்ந்து தயாரித்த ரிப்போர்ட் அது, நன்கு ஆலோசித்து கவனமாக பேசினார் புஷ்.

“தீவிரவாதத்திற்கெதிரான பெரும் போர் தொடங்கிவிட்டது, இந்த கொடுமைக்கு காரணமானவர்களுக்கு அமெரிக்க நீதி என்றால் என்ன என்பதை காட்டுவோம்”

அமெரிக்கா இப்படி கிளம்பும் என்று பின்லேடனுக்கு தெரியாதா? நிச்சயமாக தெரியும், போர் என்பது பெரும் செலவு பிடிப்பது.

போர் என்ற சகதிக்குள் அமெரிக்க யானையை இழுத்து விடவேண்டும், அதிலே சிக்கி சிக்கி அந்த யானை மடங்குமட்டும் அடிக்கவேண்டும், ஒரு கட்டத்தில் அரபு அரசியலை விட்டே அமெரிக்கா ஓடவேண்டும், அமெரிக்காவே ஓடிவிட்டால் வேறு யார் எதிரி?

ஆப்கன் காட்டுக்குள் தாடிவைத்த கூட்டம் அப்படி யோசிக்கும் பொழுது அமெரிக்க மூளை வேறு ஆட்டத்திற்கு தயாரானாது, ஆப்கானோடு மட்டும் நாம் நிற்கபோவதில்லை, பின்லேடனை கொன்றால் ஆயிரம் பின்லேடன்கள் உருவாவார்கள், அல்கய்தாவின் நிதிமூலத்தை அடிக்கவேண்டும், அரபுலகத்தில் பிடியை இறுக்கவேண்டும்.

இஸ்ரேலுக்கோ வருடமுழுக்க விடுமுறை அளித்து கொண்டாடும் அளவிற்கு சந்தோஷம்.

முதலில் ஆப்கானில் தொடங்கிய போரில் அல்கய்தாவை கட்டுபடுத்தினார்கள்,இல்லை என்றால் பின்லேடன் விஷ்கிருமி குண்டு தயாரிப்பில் வெற்றிபெற்றிருப்பார், ஆப்கனை விட்டு வெளியேறிய பின்லேடனை உலகம் வலைவீசி தேடியது, தனது வீட்டில் வைத்துகொண்டே பாகிஸ்தானும் தேடியது, பாகிஸ்தான் வேறு எங்கு தேடும்?

இந்திய காஷ்மீரில் இருப்பதாக கதைவிட்டு இந்திய அமைதியை வழக்கம் போல கெடுக்க நினைத்தது.
ஆனால் அமெரிக்காவிற்கோ செலவு அதிகமாகிறது,

அமெரிக்க வருமானத்தை கொட்டி நாசமாய் போகவா?, பின்னர் பின்லேடன் சிரிக்கமாட்டாரா? , சதாமை அடித்தார்கள், பாக்ததாத் போகவேண்டிய அமெரிக்க படை முதன் முதலில் ருமைலா எண்ணெய் வயலுக்குத்தான் சென்றது.

ஒரு கட்டத்தில் சதாமும் விரட்டபட்டார், ஆனால் பின்லேடன் ஆடிகொண்டுதான் இருந்தார், மற்ற இயக்கங்களுக்கும் அல்கய்தாவிற்கும் பெரிய வேறுபாடு உண்டு, அதன் பலம் அதுதான், புலிகள் இலங்கையில், அராபத் பாலஸ்தீனத்தில் மட்டும்தான், ஆனால் அல்கய்தா உலகெங்கும் பரவிய இயக்கம், எங்கும் எப்படியும் தாக்கும் வல்லமை கொண்டது.

லண்டன்,ஸ்பெயின் ரயில் நிலையத்தை தாக்கினார்கள், அமைதியான கிழக்காசியாவின் பாலிதீவில் தாக்கினார்கள், ஆனால் அமெரிக்காவோ ஈராக்கை துவைத்து காயபோட்டது, பின்லேடனை விட அவர்கள் இன்னொருவரை தேடினார்கள் அது “இமாத் முக்னியே”, அமெரிக்க கூற்றுபடி அவர் பின்லேடனை விட ஆபத்தானவர், கொடூரமானவர் செப்டம்பர் தாக்குதலுக்கு அவரே மூலம், முந்திகொண்டது மொசாத் ஒரு கார்குண்டுவெடிப்பில் முக்னியே முக்தி அடைந்தார்.

பின்னர் சதாமுக்கு தூக்கு, ஒரு வழியாக பாகிஸ்தானில் பின்லேடனை கண்டுபிடித்து இரவோடு இரவாக பாகிஸ்தானுக்கு தெரியாமல் தூக்கினாலும் ஐ.எஸ்.ஐ க்கு தெரியாமல் சாத்தியமில்லை.

பின்லேடன் இல்லாத அல்கய்தா இயங்கத்தான் செய்கிறது, ஆனால் பழைய தெம்பு இல்லை, கடந்த 10 வருடமாக பெருந்தாக்குதல் செய்யவில்லை.

ரஷ்யாவை அடக்க பின்லேடனை வளர்த்து, மாபெரும் பொருட்செலவில் அவரை அழித்து, பின்னாளிலாவது அமெரிக்கா திருந்தியதா என்றால் இல்லை. திருந்தமாட்டார்கள் அதே ஆப்கன் தவறை சிரியாவில் செய்தார்கள், இன்று மறுபடியும் அலறுகின்றார்கள்,அலறட்டும்

எல்லா பெரியநாடுகளும் தீவிரவாதத்தினை வளர்த்து கையை சுட்டுகொண்டவைகள் தான், பிந்திரன் வாலே முதல் ஈழபோராளிகள் வரை அப்படித்தான் உருவாக்கபட்டார்கள், அவர்கள் அடியாளாக இருக்கும்வரை பிரச்சினை இல்லை, நாங்களும் ஆளப்போகிறோம் என்பதில்தான் பிரச்சினை தொடங்கி பற்றி எரியும்.
உப்பை தின்றால் தண்ணீரை குடிக்கவேண்டும், பெட்ரோலாக குடித்தால் எப்படி? எரியத்தான் செய்யும்,
மறுபடியும் அலறுகின்றார்கள், அன்று பின்லேடன் இன்று ஐ.எஸ் இயக்கம்

இந்த 2018 செப்டம்பரில் சிரியாவின் இத்லீப் நகரில் அமெரிக்கா சந்திக்கும் ஐஎஸ்ஐஎஸ் சின் மூலம் யார்?, யாருமல்ல சாட்சாத அமெரிக்காவே தான்

அவர்கள் ஒரு காலமும் திருந்த மாட்டார்கள். திருந்தினால் வல்லரசாக இருக்கவும் மாட்டார்கள். வல்லரசுகளின் ஜாதகம் அப்படி.

அது ஒரு பக்கம் இருந்தாலும் , 15 ஆண்டுகளுக்குள் அதே அளவு பெரும் கட்டிடத்தினை அருகிலே அமைத்து பழிதீர்த்துகொண்டார்கள், எப்படி?

ஈராக் அவர்கள் கையில் இருக்கும் பொழுது, அவர்களுக்கென்ன. ஆயிரம் கட்டுவார்கள். சண்டை பின்லேடனோடு ஆனால் அகப்பட்டது சதாமின் ஈராக்.
இதுதான் சர்வதேச அரசியல் நீதி, வல்லான் வகுத்த நீதி

செப்டம்பர் 11 சம்பவத்தாலும், பின்லேடனை தேடி திரிந்ததாலும் அமெரிக்கா இழந்தது அதிகம் , ஆனால் பெற்றது, பெற்றுகொண்டிருப்பது மிக அதிகம்.

இன்னும் நிறைய பெறும் திட்டம் இருக்கின்றது

சொந்த நாட்டில் தன் மக்களை அமெரிக்கா இழந்தது அதுதான் முதல்முறை, அதற்கு முன் பேர்ள் ஹார்பரில் அமெரிக்க கடற்படையினை ஜப்பான் தாக்கி இருந்தது

முதன் முதலாக சொந்த பொதுமக்களை தங்கள் வரலாற்றிலே அந்நிய தாக்குதலுக்கு இந்த 9/11 தாக்குதலில்தான் பலிகொடுத்தார்கள்

அது கடையாக இருக்கவேண்டும் என்ற கடும் முயற்சியில் அதன் பின் அங்கு பெரும் தாக்குதல் எல்லாம் இல்லை, அவர்களின் கடும் பாதுகாப்பு தொடர்கின்றது

எனினும் உலக வரலாற்றில் மிக பெரும் பரபரப்பினை ஏற்படுத்திய, அரபு நாடுகள் நிம்மதியினை குலைத்துவிட்ட தாக்குதல் அது என்பதில் சந்தேகமில்லை

Image may contain: cloud

இம்மானுவேல் சேகரன்

அந்த சம்பவமும் அதை தொடர்ந்த கலவரமும் தமிழகத்தின் இருண்ட நாட்கள், தமிழகம் முழுக்க அக்கலவரம் பரவி விடுமோ என அஞ்சிய நாட்கள்

சாதி ஒழிப்பு போராளிகளான‌ அண்ணாவோ, கலைஞரோ ஏன் கம்யூனிஸ்டுகள் கூட அந்த கலவரத்தை கண்டிக்க தயங்கினர், அவ்வளவு பெரிய வெறியாட்டம் அது

பெரியார் ஒருவர் மட்டும் தைரியமாக முழங்கி கொண்டிருந்தார், “அந்த‌ முத்துராமலிங்கம் எனும் பயலை பிடித்து உள்ளே போடாமல் கலவரம் அடங்காது, சர்க்கார் அதை உடனே செய்யட்டும்” என தைரியமாக சொன்ன ஒரே தலைவர் அவர் ஒருவர்தான்

காரணம் அவருக்கு வோட்டு கணக்கு இல்லை, சமூக கணக்கே இருந்தது

என்ன நடந்தது?

1957ல், அந்த‌ தேர்தலில் முத்துராமலிங்க தேவரின் ஆதரவு பெற்ற சசிவர்ணதேவர் வெற்றிபெற்றிருந்தார். இதனை தொடர்ந்து இராமநாதபுரம் பக்கம் கலவரம் பரவியது, ஏன் பரவியது என்பதுதான் மர்மம்.

இந்த கலவரத்தில் தாழ்த்தபட்ட மக்களின் பிரதிநிதியாக இன்றைய திருமா போல் துணிவாக வந்து நின்றவர் இம்மானுவேல் சேகரன்

அந்த கமுதி ராமநாதபுரம் முதல் மதுரை தேனி வரையான பகுதியில் கடவுளுக்கு நிகராக வணங்கபட்டவர் பசும்பொன் தேவர், அவரின் முக்குலமே அப்பக்குதியில் ஆண்டுகொண்டிருந்தது

தாழ்த்தபட்ட மக்களும் இருந்த அப்பகுதியில் ஆங்காங்கே மோதல்கள் இருந்தன, நிச்சயம் தேவரை முழுக்க சொல்லவும் முடியாது. மதுரை ஆலயத்தில் தாழ்த்தபட்ட மக்கள் நுழைய போராடியவர் தேவர்

ஆனால் அவரின் அடிப்பொடிகள் நிகழ்த்திய கலவரங்களை அவர் ஏன் தடுக்கவில்லை என்பதுதான் வரலாற்று மர்மம்

இம்மானுவேல் சேகரன் என்பவர் யார்? என்றால், அவரும் அப்பகுதிக்காரர் அன்றே ராணுவத்தில் இருந்தவர், படித்தவர். 7 மொழிகள் அவருக்கு தெரிந்திருந்தன. அப்பக்கம் தாழ்த்தபட்ட மக்களின் குரலாக உருவானார், ஒரு கட்டத்தில் ராணுவ பணியினை விட்டுவிட்டு பொதுவாழ்க்கைக்கு வந்தார்.

அப்போது திமு கழகத்தால் பலமிழந்துகொண்டிருந்த காங்கிரசுக்கு இம்மானுவேல் போன்றோரை இணைக்க வேண்டிய அவசியம் இருந்தது.

இன்னொன்று இம்மானுவேல் சேகரனை சேர்த்துகொள்ள மற்ற கட்சிகளுக்கு தயக்கமும் இருந்தது எல்லாம் வோட்டு கனக்கு

என்னதான் சமதர்மம் பேசினாலும் இம்மானுவேல் சேகரனை சேர்த்துகொள்ள அண்ணாவுக்கும் தயக்கம் இருந்தது, அது பயமா அல்லது வேறுவிஷயமா என தெரியவில்லை.

முக்குலத்தோர் வாக்கு வங்கியினை இழக்க திமுக விரும்பவில்லை என பின்னாளில் சொல்லபட்டாலும் இறுதிவரை அண்ணா அதுகுறித்து பேசவில்லை

சாதி ஒழிக்கவேண்டிய திமுக அன்று காங்கிரசை ஒழிப்பதிலே குறியாக இருந்தது.

ஏதோ ஒன்றிற்கு அஞ்சி யாரும் இம்மானுவேல் சேகரனை சேர்க்க தயங்கிய காலத்தில்தான் காமராஜர் அவருக்கு கை கொடுத்தார்.

இந்நிலையில்தான் தேர்தலும் நடந்து அதில் கலவரமும் வெடித்தது. ஏன் கலவரம் வெடித்தது என்பதற்கு இன்றுவரை பதில் இல்லை, பெரும் கலவரங்கள் எல்லாம் இந்தியாவில் அப்படித்தான். அழிவு தெரியுமேயன்றி வெடித்தபுள்ளி தெரியாது, ஆனால் நெடுநாள் வன்மம் மட்டும் காரணம் என்பது புரியும்.

அப்படி அந்த கலவரத்தை தடுக்க சில அமைதி முயற்சிகளும் எழுந்தன, அவற்றில் ஒன்றுதான் ஆட்சியர் தலமையிலான கூட்டம். அதில் தேவர், சரிவர்ணதேவர் போன்றோர் அப்பக்கமும், இம்மானுவேல் சேகரன் உட்பட 7 பேர் இப்பக்க சார்பாகவும் கலந்துகொண்டனர்.

அதில் உணர்ச்சிகரமாகவும், துணிவாகவும் பேசினார் இம்மானுவேல் சேகரன்.

மறுநாள் கொல்லபட்டார், தேவரை எதிர்த்து பேசியபின் அவர் கொல்லபட்டதால் பழி பசும்பொன் தேவர் மீது விழுந்தது

கொல்லபடும்பொழுது இம்மானுவேலின் வயது 33.

விவகாரம் விஸ்வரூபமானது, கொலையாளிகளை பிடிக்க முயன்றபொழுதுதான் கீழ தூவல் துப்பாக்கி சூடு எல்லாம் நடந்து அப்பகுதி எரிந்தது.

ரத்த ஆறு பொங்கி ஓடியது, தென்னகம் முழுக்க கலவரம் பரவி விடுமோ என்ற அச்சம் மேலோங்கியது

தாழ்தபட்ட மக்களுக்கு தமிழகத்தில் சுதந்திர இந்தியாவில் முதல் தலைவனாக தோன்றிய இம்மானுவேல் சேகரனை அரவணைத்த பாவத்திற்காக காமராஜர் சாதிவெறியினை தூண்டிவிட்டவர் என்ற பழி சுமந்தார்

பலர் அதை ரசித்தனர், ஆனால் யாரும் கலவரங்களை கண்டித்தோ ஜாதிவெறியினை கண்டித்தோ பேசவில்லை

பெரியார் மட்டும் துணிச்சலாக “அந்த முத்துராமலிங்கம் (சாதிபெயரை பெரியார் சொல்லமாட்டார்) என்பவரை பிடித்து உள்ளே போட்டால் ஒழிய அங்கு கலவரம் நிற்காதுங்க” என தைரியமாக சொன்னார்.

வேறு ஒரு தலைவனுக்கும் அதை பற்றி கருத்து சொல்ல தைரியமில்லை அண்ணா, கலைஞர் உட்பட.

பின்பு பல சர்ச்சைகள் எழுந்தன, வழக்குகள் எல்லாம் நடந்தன. முத்துராமலிங்க தேவர் இம்மானுவேல் கொலை வழக்கிலிருந்து விடுவிக்கபட்டார்.

அதாவது தா.கிருட்டினன் வழக்கிற்கு இம்மானுவேல் சேகரன் வழக்குதான் முன்னோடி, கிட்டதட்ட மூடபட்ட வழக்கு

இம்மானுவேல் சேகரனின் ரத்தம் அந்த சாதி வெறி கொலையாளிகளின் கரங்களில் மட்டுமா உண்டு என்றால் இல்லை

தாழ்த்தபட்ட மக்களின் தலைவனான இம்மானுவேலை ஆதரிக்க எல்லோருக்கும் பயம், அம்மக்களை எட்டிபார்க்க எவனுக்கு அக்கறையில்லை.

அன்று திருமா இல்லை, கி.சாமி இல்லை, பா.ரஞ்சித் இல்லை.

ஈழத்தில் சாதியினை டுமீல் டூமில் என சுட்டுவிட்டு இன்று

நிச்சயம் இம்மானுவேல் சேகரனுக்கு அடைக்கலம் கொடுத்திருக்கவேண்டியது அந்நாளைய சாதி ஒழிப்பு போராளிகள் செய்தார்களா?

தி.க செய்ததா? திமுக செய்ததா இல்லை, அப்படி ஒரு எண்ணமே இல்லை

இம்மானுவேல் சேகரனுக்கு அடைக்கலம் கொடுத்து அவர்கள் காத்திருக்க முடியும் ஆனால் செய்யவில்லை

அவர்களுக்கு திருப்பி அடிக்க தெரியாத‌ பிராமணன் மட்டுமே கண்ணுக்கு தெரிவானன்றி, திருப்பி அடிக்கும் எந்த சாதியும் கண்ணுக்கு தெரியாது

இம்மானுவேல் செய்த தவறு என்னவென்று கொலை வழக்கில் விசாரிக்கும்பொழுது தெரிந்த உண்மை, ஒரு தாழ்த்தபட்டவன் தேவருக்கு எதிராக கலெக்டர் முன் நாற்காலியில் அமர்ந்துவிட்டான் என்பது

அந்த வெறிதான் கொலைக்கு காரணமேயன்றி, தேவரை கடவுளாக வழிபட்ட கூட்டத்தின் வெறியே காரணமன்றி வேறு அல்ல என்பது பின்னாளில் விளங்கிற்று

தேவரும் கொலைக்கு காரணம் அல்ல என நீதிமன்றமும் சொல்லிற்று.

ஆனால் இம்மானுவேல் சேகரனி சாவு வீணாகவில்லை, அதுவரை அவர்களுக்கொரு தலைவன் இல்லை, அவர்கள் குரலை சொல்ல யாருமில்லை

நாமெல்லாம் திராவிடர்கள் அதனால் எங்களுக்கு வாக்களிக்க வெண்டும், தமிழையும் பிராமண எதிர்ப்பையும் காப்பாற்ற எங்களை அன்றி யாருமில்லை என சொல்லி கொண்ட திமுகவோ திகவோ அவர்களை எட்டிபார்க்கவில்லை

இந்தியினை எதிர்த்த அளவு, இந்த சாதிவெறி கொலைகளை திமுக எதிர்க்கவில்லை என்பது இன்னொரு கோணம்

எல்லாம் சமூக நீதி எனும்பெயரில் நடந்த வாக்கு அரசியல் அன்றி வேறல்ல‌

ஒரு விஷயம் உறுதியாக சொல்லமுடியும், தாழ்த்தபட்ட மக்களுக்கு இம்மானுவேல் சேகரன் மிக உறுதியான தலைவராக திகழ்ந்தார் ஆனால் வீழ்த்தபட்டார்

இன்று அவர் வழியிலே திருமா போன்றவர்கள் வந்தார்கள், நிலைத்தார்கள். இன்று வலுவாக அவர்களால் கத்தவாவது முடிகின்றது

இம்மானுவேல் சேகரன் கொல்லபட்டாலும் திருமா போன்றவர்களின் உருவில் வாழ்ந்து கொண்டுதான் இருக்கின்றார்

தமிழகத்தின் கொடூர சாதிவெறிக்கு பலியான இம்மானுவேல் சேகரனுக்கு ஆழ்ந்த அஞ்சலிகள்

எப்படிபட்ட கொடூர காலங்களை எல்லாம் தமிழகம் கடந்திருக்கின்றது என்பதற்கு சாட்சியாக இம்மானுவேல் சேகரனின் கல்லறை நிற்கின்றது

இனி அப்படிபட்ட மோதல்களும் வேண்டாம், சாவுகளும் வேண்டாம்

ஒழியட்டும் சாதி, வலுக்கட்டும் மானிட நேயம். அதுவே இம்மானுவேல் போன்றோருக்கான மகத்தான அஞ்சலி

அந்த அஞ்சலில் அவருக்கானது மட்டுமல்ல, அதன் பின் அவர் சாதியிலும் எதிர் சாதியிலும் ஏராளமானோர் செத்தனர், எல்லோருக்கும் சேர்த்தே அஞ்சலி

இம்மானுவேல் சேகரனின் நினைவு நாளுக்காக பலத்த ஏற்பாடுகள் செய்யபட்டிருக்கின்றன, சாதி கொடுமைக்காக செத்தவர் அவர் என்பதில் சந்தேகமில்லை ஆனால் அந்த பரிதாபத்திற்குரிய மனிதனின் நினைவுநாள் அமைதியாக நடக்க வேண்டும்

அதுதான் அவருக்கான மகத்தான அஞ்சலி, அந்த நினைவு அஞ்சலி மிக மிக அமைதியான முறையில் நடப்பதே அவருக்கு பெருமையும் கவுரவமும் ஆகும்

Image may contain: 1 person, closeup
———————————————————————————————————————————————————————————————————————————————————————————-

 

இம்மானுவேல் சேகரனின் நினைவுநாள் 144 தடை போட்டு அனுசரிக்கபடுகின்றது, இனி பசும்பொன் தேவரின் நினைவு நாளுக்கு கேட்கவே வேண்டாம்

இது போல ஒவ்வொரு சாதி அடையாளத்தவர் நாளிலும் இதே 144

ஆனால் கேளுங்கள், இது பெரியார் மண் என பெரும் வீராவேசம்

இம்மாதிரியான காலங்களில் பெரியார் மண் என்பது மறந்தே போகும், பெரியார் மண்ணிலா சாதி அடையாளங்களுக்கு 144 என யாரும் கேட்கமாட்டார்கள்

பெரியார் நினைவு சமத்துவபுரங்கள் எல்லாம் சாதியினை ஒழித்ததா என கேட்க கூடாது, அதெல்லாம் கனவு காட்சிகள், கள யதார்த்தம் அல்ல‌

பெரியார் மண் இது என சொல்ல இம்மாதிரி காலங்களில் முடியுமா? நிச்சயம் முடியாது

ஆனால் தேசிய கட்சிகளை எதிர்த்து அரசியல் காட்சி வரட்டும், “டேய் இது பெரியார் மண் இந்திய தேசிய கட்சிகள் காலூன்ற முடியாது..” என சீறுவார்கள்

ஆனால் சாதி அடையாளங்களுக்கு 144 போட்டால், தீகோழி மண்ணுக்குள் தலைவைத்து கொண்டது போல் பதுங்குவார்கள்

எவனாவது ஒரு பெரியாரிஸ்ட், இந்த தமிழகத்தில் சாதி தலைவர்களுக்கான குருபூஜை தடைசெய்யபட வேண்டும், இதெல்லாம் சாதி அடையாளங்களை வலுபடுத்தும் அதனால் அரசுஇதை தடை செய்யட்டும் என சொல்லட்டும் பார்க்கலாம்

சொல்லமாட்டான், ஆனால் சும்மா பிரமணன், மனுநீதி என சம்பந்தம் இல்லாமல் உளறிகொண்டிருப்பான், கேட்டால் சாதியினை சொன்னது பிராமணனாம்

அவனா இம்மானுவேல் சேகரனை கொல்ல சொன்னான்? என்றால் பதிலே வராது. காரணம் அரசியல்

முதலில் இது பெரியார் மண் என இந்திய தேசியத்திற்கு எதிராக‌ அரசியல் செய்பவன் பூரா பயலுக்கும் 144 போட வேண்டும்

பெட்ரோல் விலை உயர்வுக்கு எதிராக பந்த்

பெட்ரோல் விலை உயர்வுக்கு எதிராக இன்று மிகபெரிய பந்த் இந்தியாவில் நடக்கின்றது

இந்த கடும் உயர்வுக்கும் அரசின் அந்த பிடிவாத கொள்கைக்கும் காரணம் என்னவென்றால் விஷயம் வித்தியாசமானது

ஸ்டான்டர்ட் ஆயில் என இந்திய ஆயில் கார்பரேஷன் இருந்தபொழுது இங்கு பெட்ரோல் பயன்பாடு பணக்காரரிடம் மட்டும் இருந்தது, டீசல், லாரி போன்றவற்றில் இயங்கும் பேருந்துகள் பணக்காரர்களிடமே இருந்தது

(பின்பு தொழில்முறையில் பயன்படுத்தும் மீனவர்கள் போன்றவர்களுக்கு மானியம் எல்லாம் வழங்கபட்டது)

பெட்ரோலை அதிகம் பயன்படுத்தியது அன்று வரிகட்டும் பணக்காரர்கள், வெளிநாட்டில் இருந்து கார் பைக் எல்லாம் வாங்கி வந்து வரிகட்டும் பெரும் பணக்காரர்கள் என்பதால் அவர்களிடம் வசூலிப்பதில் தவறில்லை என பெட்ரோலுக்கு பெரும் வரி விதிக்கபட்டது

அன்று கச்சா எண்ணெய் விலையும் சில டாலரில் இருந்தது, இந்திய பணமும் பெரும் சரிவில் இல்லை

சிக்கல் எப்பொழுது வந்ததென்றால் அரபு இஸ்ரேலிய போரின் தொடர்ச்சியில் எண்ணெய் விலை எகிறவும், இந்தியாவில் மக்களின் வாங்கும் சக்தி அதிகமானதும் காரும் பைக்கும் சாலைகளை நிரப்ப தொடங்கவும் வந்தது

பணக்காரர் விஷயமாக இருந்த காரும் பைக்கும் எல்லோருக்கும் கிடைத்தது, ஆனால் அரசோ பணக்காரருக்கு விதித்த அதே வரியினை சாதாரண மக்களுக்கும் விதிப்பதை தொடர்ந்தது

இதுதான் பிரச்சினையின் மூலம்

மாறிவிட்ட இந்தியாவில் பணக்காரர், சாமானியர் எல்லோருக்குமான பெட்ரோல் வரியில் மாற்றம் செய்ய வேண்டிய நேரம் இது

ஆனால் செய்யமுடியாத சிக்கல், செய்தால் அரசின் வரி குறையும் பணியாளர் சம்பளம் குறையும், மாநில அரசும் தன் பங்கிற்கு குறைக்க வேண்டி இருக்கும்

ஆக இது சிக்கலான பிரச்சினை, பொருளாதார நிபுணர்களும் கலந்து மக்களின் வாங்கும் சக்திக்கு ஏற்ப விலையினை நிர்ணயிக்க வேண்டும்

இல்லாவிட்டால் பெரும் குழப்பம் ஏற்படும், காரணம் பெட்ரோல் என்பது நாட்டின் ரத்தம் தேசம் அதில் இயங்குகின்றது, அது விலை ஏறும் பட்சத்தில் எல்லா பொருளும் விலை எகிறும்

எப்படியோ புதிய பெட்ரோல் கொள்கை வகுக்க வேண்டிய நேரம் இது

இந்த போராட்டத்திற்கு இந்தியாவின் 21 கட்சிகள் ஆதரவு தெரிவிக்கின்றன, சிவசேனாவும் மம்தா பார்ட்டியும் சத்தமில்லை

பாஜகவினை இந்தியாவினை விட்டு விரட்டுவோமெ என முழங்கும் ஸ்டாலினின் திமுக இதில் ஆதரவு மட்டும் தெரிவிகின்றது

முன்பெல்லாம் திமுக இப்படி இல்லை

பருப்பு விலை கூடினால் கூட “பக்தவத்சலம் அண்ணாச்சி பருப்பு விலை என்னாச்சி” என கோஷமாக கிளம்புவார்கள்

அரியலூர் ரயில் விபத்தில் “அரியலூர் அழகேசா நீ ஆண்டது போதாதா, நாங்கள் மாண்டது போதாதா” என கிளம்புவார்கள்

திமுகவின் ஸ்பெஷாலிட்டியே இம்மாதிரி கோஷமும் போராட்டமுமே

ஆனால் அது இப்பொழுது சுத்தமாக மாறிவிட்டது, எல்லாம் கலைஞரோடு போய்விட்டது

“பெட்ரோல் விலை ஏற்றிய பெருமாளே” “கண்ணீரில் கார் ஓடுமா?” என்றெல்லாம் கிளம்பியிருக்க வேண்டிய திமுகவினர் இப்பொழுது சும்மா அறிக்கை மட்டும் விடுகின்றார்கள்

எதற்காக?

அன்று திமுக பாட்டாளி இயக்கமாக இருந்தது, பொங்கினார்கள். இன்று பணக்க்கார கட்சியாகிவிட்டது எல்லோருக்கும் ரெய்டு பயம் இன்னபிற‌

தமிழக அரசோ எப்படியாவது இந்த ஸ்டைரைக்கை முறியடித்து மோடி விசுவாசத்தை காக்க தலைகீழாக நிற்கின்றது

வடகொரியா தேசியவிழா

இந்த வடகொரியா சத்தமே இல்லை என்றாலும் இப்பொழுது தான் மிக மிக அதிகமாக பதுங்குவதை பரிதாபமாக உலகிற்கு காட்டுகின்றது

அந்நாட்டின் தேசியவிழா கொண்டாடபட்டது, வழக்கமாக இந்த விழாவில் பிராதனமாக அவர்கள் ராணுவ அணிவகுப்பும் அதில் அவர்களின் நேடாங் ரக பாலிஸ்டிக் ரக ஏவுகனைகளும் இருக்கும்

அந்த பவனியினை கம்பீரமாக பார்க்கும் வடகொரிய அதிபர் அமெரிக்காவிற்கும் ஜப்பானுக்கும் சவால் விடுவார்

இந்த விழாவில் அந்த ஏவுகனைகளையும் காணவில்லை, அதிபரின் சவுடாலையும் காணவில்லை, அந்த நெடுந்தூர ஏவுகனைகள் காணபடாதது உலகில் சலசலப்பினை ஏற்படுத்தியாயிற்று

டிரம்ப் மிக மகிழ்ச்சியாக எம்.ஆர் ராதா ஸ்டைலில் “குட் பாய் , திருந்திட்ட நீ இப்படித்தான் இருக்கணும். இன்னும் சிலபேர் உலகத்தில இப்படி திருந்தணும், திருந்தலண்ணா திருத்துவான் இந்த டிரம்ப்

இந்த பணம் இருக்கே அது பத்தும் செய்யும், என்கிட்ட பதினொன்னும் செய்யும்” என சொல்லிகொண்டிருகின்றார்

வடகொரியா இவ்வளவு அஞ்சும் என யாரும் எதிர்ப்பார்க்கவில்லை

அந்த மைக் பாம்பியோ வடகொரியாவிற்கு சென்று “என் பேரு மாணிக்கம், எனக்கு இன்னொரு பெயர் இருக்கு” என சொல்லி வந்ததில் இருந்து இப்படி அரண்டு கிடக்கின்றது வடகொரியா

இதில் கவனிக்கவேண்டிய விஷயம் என்னவென்றால் அதே பாம்பியோதான் சில நாட்களுக்கு முன்பு இந்தியாவிற்கும் வந்து சென்றார்.

இனி இந்தியா என்னாகபோகின்றதோ தெரியவில்லை, வடகொரிய பாணியில் சரண்டர் ஆகாமல் இருந்தால் சரி


 

உலகில் ஒரு பெரும் ரவுடி காமெடியனாகி போன விஷயம் இந்த வடகொரிய தக்காளி விஷயத்தில் நடந்திருக்கின்றது

சி.ஐ.ஏ தலைவர் மிரட்டிய மிரட்டலில் ஆளே மாறிபோனார், “என் பெயர் பாம்பியோ, எனக்கு இன்னொரு பேர் இருக்கு” என அவர் மிரட்டிய மிரட்டலில் “அண்ணேன்டா…” என குனிந்து கிடக்கின்றார் வட கொரிய கிம்

கடந்த முறை டிரம்பினை சிங்கப்பூரில் பார்த்த பின் , நேற்று அண்ணே இன்னொருமுறை உங்களை பார்க்கணும்னே.. வாங்கண்ணே” என கடிதம் எழுதிவிட்டார் கிம்

“பார்த்தீர்களா என் ராஜதந்திரத்தை, அந்த ரவுடி கிம்மையே கெஞ்ச வைத்துவிட்டான் இந்த டிரம்ப்..” என அந்த கடிதத்தோடு கம்பீரமாக வெள்ளை மாளிகையினை சுற்றி வருகின்றார் டிரம்ப்

இலங்கை யுத்தம்

ஏராளமுறை எழுதியாயிற்று ஆயினும் இப்பொழுதும் சொல்லலாம்

இலங்கை யுத்தத்தில் ஈழமக்களை காக்க புலிகளாலும் இன்னபிற போராளி குழுக்களாலும் முடியவில்லை

அகதிகளாக இந்தியாவிற்குத்தான் வந்தனர், இந்நாடும் அடைக்கலம் கொடுத்தது

புலிகளோ யுத்தம் தொடர்ந்தனர், மக்கள் அகதிகளாக வந்து கொண்டே இருந்தனர், சில இடங்களில் சிங்களனிடமும் சிக்கினர்

அதுவும் வடமாரட்சி முற்றுகையில் பிரபாகரனை மண்டையில் போட இருந்த நிலையில்தான் இந்தியா களமிறங்கி அமைதி படையினை அனுப்பியது

அதை வம்பிழுத்து மோதியது புலிகள்

எந்த சிங்களனிடமிருந்து தமிழரை காக்க அமைதிபடை அனுப்பபட்டதோ அதே சிங்களனிடம் சேர்ந்து இந்திய படையினை எதிர்த்து அழிச்சாட்டியம் புரிந்தனர் புலிகள்

இந்திய ராணுவம் மேல் பயங்கர கட்டுகதைகளும் வந்தன, இந்திய ராணுவமும் திரும்பியது

அதன் பின்ராஜிவ் கொல்லபட்டு இந்தியா ஒதுங்கியது, 2009ல் கேட்க ஆளின்றி புலிகள் ஒழிக்கபட்டனர்

இப்பொழுது ராஜிவ் கொலையாளிக்கு தூக்கு என்றால் அமைதிபடை அட்டகாசம் என பலர் கிளம்புகின்றனர்

அமைதி படையோடு புலிகள் மோதாமல் இருந்தால் ராஜிவும் கொல்லபட்டிருக்கமாட்டார், 20009 அழிவும் நடந்திருக்காது

முழு முதல் காரணம் புலிகளே

இதில் 4 இலங்கையரும் தமிழரே என சிலர் கிளம்புகின்றான், ஆனால் ராஜிவோடு கொல்லபட்ட 16 பேரில் 15 பேர் தமிழர் என்பதை மறக்க சொல்கின்றார்கள்

ஈழத்தில் சக போராளி தமிழர்களை புலிகள் கொன்றதை எல்லாம் மறக்க சொல்கின்றார்கள்

4 பேர் தமிழர் என்பதால் இலங்கையரை விட முடியுமா? நிச்சயம் முடியாது

இவர்களை எல்லாம் வாழ்நாள் சிறையில் வைக்க வேண்டும்



 

எகிப்தில் அரசுக்கு எதிராக கிளர்ச்சி செய்த 76 பேருக்கு தூக்கு

இந்தியாவில் முன்னாள் பிரதமரை கொன்ற இலங்கை நாட்டு தீவிரவாதிகளை விடுவிக்க இந்தியாவின் தமிழ்நாடு மாநில தலைவர்கள் வலியுறுத்தல்

இதெல்லாம் உலக செய்திகள். சொந்த நாட்டு தலைவனை கொன்ற வெளிநாட்டு தீவிரவாதிகளை விடுவிக்க சொல்லும் ஒரே மாநிலம் தமிழகம்

இந்த அரசை உடனே 356ம் பிரிவில் டிஸ்மிஸ் செய்ய வேண்டும்