மனித தன்மை இல்லாதது

ஒரு கிறிஸ்தவன் இறந்துவிட்டார் , அவர் உடலை இந்துமதபடி அடக்கம் செய்ய இந்துத்வா கும்பல்கள் மல்லுகட்டின என்றொரு வீடியோ காணமுடிந்தது

இப்பொழுது வரும் வீடியோக்களில் அங்கிள் சைமனின் வீடியோ தவிர ஏதும் நம்ப கூடியவை அல்ல, அங்கிள் ஒருவரை முழுக்க நம்பலாம்

இந்த வீடியோ சம்பவத்தின் மூல சிக்கல் எதுவென தெரியவில்லை, ஒருவேளை அவர் மதமாற்றம் செய்யபட்டிருக்கலாம்

சில நாடுகளில் “நீ எந்த மதத்தையும் பின்பற்று ஆனால் உன் அடையாளம் இந்தமதம்தான் , அரசு ஆவணபடி அதுதான். நீ எந்த மதத்தில் செத்தாலும் ஆவணம் சொல்லும் மதம்தான் உனது, அதுபடிதான் இறுதிகாரியம்” எனும் மவுன சட்டங்கள் உண்டு

இங்கு அப்படியாக ஊர்கட்டுபாடு என ஏதோ இருந்திருக்கலாம், அது சர்ச்சையாகியிருக்கலாம்

என்ன இருந்தாலும் இறந்தவர் உடலில் மதபேதம் பார்ப்பது சரியல்ல‌

“ஒருவன் இறந்தால் அந்த இடத்தில் நீ ஞானம்பெறும் பொருட்டு அவன் பகைவனாக இருந்தாலும் போ, இறந்தவன்னை தகனமோ அடக்கமோ செய்வது வாழும் மனிதனின் கடமை” என்றுதான் எல்லா மதமும் சொல்ல்கின்றன,

இந்த சர்ச்சை நிச்சயம் மனித தன்மை இல்லாதது

ஆயினும் சாதி அடிப்படையில் பிரிந்து இந்த சாதி கிறிஸ்தவன் உடலை அந்த‌ சாதி கிறிஸ்தவர்களின் கல்லறை தோட்டத்தில் அடக்கம் செய்ய விடமாட்டோம் எனும் கொடூர கிறிஸ்தவர்கள் செய்யும் காரியத்தை விட இது ஒன்றும் கொடியதல்ல‌

சாதி கொடுமையினை பின்பற்றும் கிறிஸ்தவர்கள் இதை கண்டிக்க தகுதியே இல்லாதவர்கள்

இது கண்டிக்கதக்கது

ஏர் இந்தியா நிறுவனத்தில் விமான டிக்கெட்டுகளில் பிரதமர் மோடியின் படம் இடம் பெற்று இருந்தது, தேர்தல் வீதி மீறல் என்பதால் டிக்கெட்டுகளை உடனடியாக திரும்ப பெறுகிறது

இது கண்டிக்கதக்கது, மோடி நாட்டின் பிரதமர் மன்னர் அல்ல‌

ஏதோ இது மன்னராட்சி போலவும் , ஏர் இந்தியா அவரின் குடும்ப சொத்து போலவும் டிக்கெட்டில் எல்லாம் அவர் படம் அச்சிடபட்டிருந்தது சரியல்ல‌

அதை நீக்கிவிட்டார்கள்

தேர்தல் ஆணையம் என ஒன்று இல்லாவிட்டால் ராணுவத்தின் ஏகே 47 முதல் சுகோய் விமானம் வரை இவர் படம் ஒட்டியிருப்பார்கள்

இம்மாதிரியான ஓவர் விளம்பரங்களும் அதை மோடி கண்டிக்காததும் அவர்களுக்கு பெரும் பின்னடைவே..

நாஸ்டர்டாமஸ் இந்தியா பற்றி சொன்னது

“உலகின் முடிவில் கிழக்கிலிருந்து பெரும் ராணுவம் ஒன்று வரும், சில நதிகள் காய்ந்துவிடும் அது வழியாக அந்த மாபெரும் சேனை வரும்

அந்த வலிமையான சேனை மாபெரும் யுத்தத்தை தொடுக்கும், அதை தடுப்பார் யாருமிலர்.”

இப்படி சொல்வது பைபிளின் திருவெளிப்பாடு

இதை முதலில் உலகம் நம்பவில்லை, கிழக்கில் இருந்து ஒரு பெரும் அரசா? வாய்ப்பே இல்லை என நம்பினார்கள்

ஆனால் செங்கிஸ்கான் அந்த அச்சுறுத்தலை கொடுத்தான், என்ன காரணமோ தெரியவில்லை அவன் மேற்காசியா பக்கம் பாயாமல் ஐரோப்பாவுக்குள் ரஷ்யா வழியாக சென்றுவிட்டான்

அதன் பின் அந்த கவலை மேற்கத்தியாருக்கு 800 வருடமாக இல்லை

சீனாவின் எழுச்சி அந்த கவலையினை மறுபடி உயிர்த்தெழ செய்தது, ஒருவேளை பைபிள் சொன்ன அந்த மாபெரும் கிழக்கு ராணுவம் சீனமோ என ஒரு தரப்பு அஞ்சுகின்றது

நல்ல வேளையாக பாஜக தரப்பின் வெறி சங்கிகளுக்கு இதெல்லாம் தெரியவில்லை

நாஸ்டர்டாமஸ் சொன்ன இந்திய ஆளுமை மோடி என நிறுத்திகொண்டார்கள், சங்கிகள் பைபிள் படிக்காததால் வந்த நல்ல விஷயம் இது

ஆனால் நாஸ்டர்டாமஸ் மோடி பற்றி ஏதும் சொல்லவே இல்லை

ஐந்துநதி கூடும் இடத்தில் இருந்து நீலநிற‌ தலைப்பாகையுடன் ஒருவர் வருவார், அவர் முப்பக்கம் கடல்சூழ்ந்த அந்த நாட்டை மாபெரும் சக்தியாக்குவார் என சொன்னார் நாஸ்டர்டாமஸ்

அது இந்தியா என்பதும் அவ்விடம் பஞ்சாப் என்பதும் கணிக்கலாம்

ஆச்சரியமாக நீல நிற தலைப்பாகையுடன் முதல் சீக்கிய பிரதமராக மன்மோகன்சிங் வந்தார், உலகம் உற்று நோக்கியது

ஆனால் மன்மோகன்சிங் வந்து சென்றாகிவிட்டது, ஒன்றும் மாற்றமில்லை

மன்மோகன்சிங்கினை கணித்த நாஸ்டர்டாமஸ் அவரை கெடுத்த திமுகவினை பற்றி கணிக்காமலா இருந்திருப்பார்?

ஆக மன்மோகன்சிங் அந்த மாபெரும் சக்தி அல்ல‌

மாறாக இன்னொரு சிங் வரலாம் அல்லது ராணுவபுரட்சியோ இல்லை வேறொதுவோ வந்து இந்தியா மாபெரும் சக்தி ஆகலாம்

நாஸ்டர்டாமஸ் இந்தியா பற்றி சொன்னது இதுவேதான்

அழுத்தமாக நீல நிற தலைப்பாகை என சொல்லிவிட்டு சென்றிருப்பதால் நாஸ்டர்டாமஸுக்கு கோடி நன்றிகள்

காவி தலைப்பாகை என்றால் என்ன ஆகியிருக்கும்?

இதுதான் தமிழக அரசியல்

மூத்தவர்களை மோடி மதிப்பது இல்லை, இதோ அத்வாணியினை ஒதுக்கிவிட்டார்கள் என பலர் கிளம்பிவிட்டார்கள்

வரலாற்றில் இக்காட்சியினை கொண்டுவந்தது காங்கிரஸ்

இந்திராவும், சஞ்சயும் அதற்கு வழிகாட்டிகள். இந்திரா என்ன மூத்தோரை மதித்தாரா? காமராஜர் முதல் கிருபாளினி வரை அவர் எப்படி மதித்தார் என்பது தெரியாதா?

கொஞ்சமும் மதித்தது இல்லை

அவர்களை ஒப்பிடும் பொழுது 91 வயது அத்வானிக்கு ஓய்வு கொடுத்திருப்பது கவுரவமே..

அத்வாணிக்கு சீட் கொடுக்கவில்லை “ஹேய்ய்ய்ய் பாசிச பாஜக..” என பொங்குபவர்கள் எல்லாம்

க‌.அன்பழகனுக்கு ஏன் சீட் திமுக‌ கொடுக்கவில்லை என பேசவே மாட்டார்கள், இதுதான் தமிழக அரசியல்..

அன்பழகனுக்கு 4 வயதுதான் அத்வாணி இளையவர்

அமெரிக்காவே கண்டிக்கும் அரசு

தூத்துக்குடி துப்பாக்கிச்சூடு சம்பவம்: அமெரிக்க அரசுத்துறை அறிக்கையில் கண்டிப்பு

உடனே இதோ பார் அமெரிக்காவே கண்டிக்கும் அரசு என கிளம்பிவிட்டார்கள்.

நாம் அப்பொழுதே சொன்னோம், தமிழ்நாடு அமெரிக்காவின் ஆதரவு பெற்ற சில சக்திகள் நடமாடும் பகுதி. இந்தியாவினை உடைக்க அவர்களை அமெரிக்கா தூண்டிவிடும் தூபமிடும்

சீனா தன் நாட்டில் செய்யாத அட்டகாசம் கிடையாது, அவர்களுடனெல்லாம் கைகுலுக்க தெரிகின்றது

இலங்கையின் முள்ளிவாய்க்கால் கொலையாளிகள் ராஜ்பக்சேயும் , சரத்பொன்சேகாவும் அமெரிக்க பிரஜைகள் ஒரு வார்த்தை கண்டிப்பு கிடையாது

அட அவ்வளவு ஏன்?

அன்றாடம் சுட்டுகுருவிகளை போல பாலஸ்தீனியரை கொன்றுகுவிக்கின்றது இஸ்ரேல், அதைபற்றி ஒரு வார்த்தை?

அமெரிகாவில் கருப்பர்களை அடிக்கடி வெள்ளை இன போலிசாரே சுட்டு கொல்கின்றனர்

அதுபற்றி எல்லாம் பேசாமல் தூத்துகுடி என்றால் ஒரு மாதிரி கிளம்புகின்றார்கள் அல்லவா? இதுதான் உலக அரசியல்

அன்றும் இன்றும் தமிழகத்தில் இந்திய எதிர்ப்பை பேசுபவர்களை கவனியுங்கள் அவர்கள் அமெரிக்க தொடர்பிலே இருப்பார்கள்

அது அண்ணா, வைகோ என யாராய் இருந்தாலும் சரி கூர்ந்து பாருங்கள் விளங்கும்

இன்னொரு நாடென்றால் இந்நேரம் சென்னை அமெரிக்க தூதரகம் முன் பொங்கியிருப்பார்கள், சென்னையில் அது சாத்தியமில்லை

அன்றொருநாள் அமெரிக்க தூதரகமே எம்மண்ணில் இருக்க கூடாது என ஈரானில் கோமேனி ஏன் அடித்து துரத்தினான் என்பது இப்பொழுது எல்லோருக்கும் புரியும்

இளையவன் என்று இகழ்ந்தால்

“போற்றுமின் மறவீர், சாற்றுதும் நும்மை,
ஊர்க்குறு மாக்கள் ஆடக் கலங்கும்
தாள் படு சின்னீர்க் களிறு அட்டு வீழ்க்கும்
ஈர்ப்பு உடைக் கராஅத்து அன்ன என்னை
நுண்பல் கருமம் நினையாது 
இளையன் என்று இகழின், 
பெறல் அரிது ஆடே.”

எதிரிப்டை வீரர்களே கேளுங்கள், சிறுவர்கள் விளையாடக் கலங்கும்படியான கால் அளவுள்ள நீருக்குள் யானையைக் கொன்று வீழ்த்தி இழுத்துச் செல்லும் முதலையைப் போன்ற வர் எம் தலைவன்,

அவன் செய்யும் பல செயல்களைக் கருத்தில் கொள்ளாமல், அவனை இளையவன் என்று இகழ்ந்தால், நீங்கள் வெற்றி பெறுவது அரிது.

சொன்னா கேளுயா

“சொன்னா கேளுயா, காங்கிரசும் நாட்டுக்கு நிறைய செஞ்சிருக்குய்யா, அதை கண்ணால கண்டவ நான்

அது உனக்கும் தெரியும், பின்ன ஏன்யா அவ்வளவு பொய்யா சொல்ற..?

இன்னொரு தடவை பெரிய பொய்ய சொல்லிட்டு இந்த பக்கம் வந்திராத ஆமா, பொய்யா சொல்லிட்டு நான் ஏழைதாயின் மகன்னு அழுதா யாருக்கு அவமானம்?”

வாரிசு அரசியல்

வாரிசு அரசியல் இன்றைய காலத்தில் அல்ல எந்த காலத்திலுமே தவிர்க்க முடியாதது

சுருக்கமாக சொல்லிவிடலாம், அதிகாரம் எங்கெல்லாம் உண்டோ அதை காக்கும் ஆசையும் எல்லோருக்கும் உண்டு மன்னர்களுக்கு பின் அவர்கள் வாரிசுகள் வருவது அப்படித்தான்

ஜனநாயகம் என சொல்லிகொண்டாலும் கட்சி அரசியலும் அதிகாரம் தக்க வைக்கும் போட்டியே, மன்னர்காலம் போல ஆயுத வெட்டு குத்து இல்லை என்றாலும் மறைமுக வெட்டு குத்துக்கள் அதிகம்

வாரிசு அரசியல் வடகொரியாவில் இருந்து இலங்கையின் பண்டாரநாயகே, பாகிஸ்தானின் பூட்டோ குடும்பம் , உட்பட ஏராளமான நாடுகளில் அப்படியே இருக்கின்றது,

மானிட சுபாவம் இது

அது அமெரிக்கா வரை பரவித்தான் இருக்கின்றது, கென்னடி குடும்பம் முதல் புஷ் குடும்பம் வரை ஏராள சாட்சி உண்டு

இந்தியாவில் நேரு குடும்பம் அதை தொடங்கி வைத்தது அதும் 4ம் தலைமுறை வரை வருகின்றது

ஒரு விஷயத்தை கவனித்தால் புரியும், நேரு குடும்பத்தினை விட்டாலும் காங்கிரஸ் சரியும், சீத்தாராம் கேசரி காலத்தில் அதுதான் நடந்தது பின்பு வலிய சோனியாவிடம் சரணடைந்தார்கள்

காங்கிரஸ் என்றல்ல பல கட்சி நிலை அப்படியே

பாஜக விதிவிலக்கு என்பார்கள், அது ஆர்.எஸ்.எஸ் அமைப்பின் முகமூடி, சீனா போன்ற கம்யூனிச நாடுகளில் பொலிட் பீரோ யாரை சொல்லுமோ அப்படி ஆர்.எஸ்.எஸ் சொல்பவரே அங்கு தலைவர்

அது ஒருவகை சர்வாதிகாரம், சீன கம்யூனிஸ்டுகளுக்கும் அவர்களுக்கும் வித்தியாசமில்லை

மற்றபடி எந்த கட்சி எடுத்தாலும் வாரிசு அரசியலின்றி அக்கட்சி சாத்தியமில்லை, ஏன் சந்திரபாபு நாயுடுவே வாரிசு அரசியலில் வந்தவர்தான், அங்கு என்ன குறைந்தது?

ஏன் வருகின்றது வாரிசு அரசியல்?

அரசியலில் நேரடி எதிர்களை விட கூட இருந்து முதுகில் குத்தும் எதிரிகளே அதிகம், ஜூலியஸ் சீசர் காலத்திலே அதுதான் இருந்தது

யாரையும் நம்ப முடியாதது அரசியல், திமுகவினையே எடுங்கள் கலைஞர் மகனை வளர்த்தார் மருமகனை வளர்த்தார் என்பார்கள் ஆனால் ஏன் வளர்த்தார்?

திமுகவினை சம்பத் உடைத்தார் அது வலியில்லை ஆனால் எந்த நடிகனை கலைஞர் கொண்டாடினாரோ அந்த ராமசந்திரனால் கட்சி உடைந்தது

பின்பு வைகோ உடைத்தார், எத்தனையோ பேரினை கலைஞர் ஏற்றிவிட்டு முதுகில் வாங்கினார், பின் யாரை அவர் மனம் நம்பும்?

தன் வீட்டு வாரிசென்றால் பாதுகாப்பு எனும் அந்த அரச தந்திர தொடர்ச்சியே அன்றி அவர் செய்தது வேறல்ல‌

எல்லா கட்சியிலும் நிலை அதுதான்

வாரிசுகள் கட்சியின் ஒரே முகமாக அறிபடுவது முதல் சிக்கலற்ற அடுத்த தலைவராக வருவது வரை ஏக அனுகூலங்கள் உண்டு

இதெல்லாம் பல்லாயிரமாண்டு மானிட குணத்தின் தொடர்ச்சியே

ஆனால் பொல்லாத வாரிசுகளை மக்கள் தூக்கி எறியவும் தயங்கவில்லை என்பது மக்களாட்சியின் மாபெரும் வசதி

அண்ணாவுக்கும், ராமசந்திரனுக்கும், ஜெயாவுக்கும் நேரடி வாரிசு இல்லை. இருந்திருந்தால் நாடு தாங்கியிருக்காது

மன்னராட்சியிலிருந்து மக்களாட்சிக்கு மாறினோமே தவிர மனதால் அதே சுயநலம், வஞ்சகம், அதிகார் போட்டி, அரசியல் கொலை என எல்லா குணங்களும் எல்லோருகுள்ளும் இருக்கின்றது

அதிலிருந்து தப்ப அந்நாளைய மன்னர்கள் வாரிசுகளை சொந்தங்களை நம்பியது போலவே இப்பொழுதும் நம்புகின்றார்கள், வேறு தெரிவு இல்லை. நம்ப கூடாதவரை நம்பினால் நொடியில் முதுகில் குத்துவார்கள்

அதிகார அரசியல் ஆசை எனும் போதை என்பது அப்படியானது

அது மாறாது, மனித சுபாவம் அப்படி

இங்கு காமராஜர், அண்ணா, ராம்சந்திரன், ஜெயா என யாருக்கும் நேரடி வாரிசு இல்லை

ஆனால் கலைஞருக்கு இருந்தது, அதனால் அவரை வாரிசு அரசியல் செய்தார் என சொல்கின்றார்களே தவிர வேறொன்றுமில்லை

இதில் கலைஞரின் தவறு ஏதுமில்லை, மொத்த உலகினையும் உற்று பாருங்கள், ஏன் இங்குள்ள மாநிலங்களையே பாருங்கள் அங்கே நடந்ததுதான் இங்கும் நடந்தது, இப்படித்தான் நடக்கவும் வேண்டும் அதுதான் கட்சிக்கும் நல்லது

அதனால் கட்சி ஆட்சி என ஒன்று இவ்வுலகில் இருக்கும் வரைக்கும் வாரிசு அரசியல் என ஒன்று இருந்தே தீரும், அது மாறவே மாறாது.

சகிக்கமுடியாததாக தெரியவில்லை

புரட்சி என்றால் என்னவென்றே தெரியாதவரை புரட்சி தலைவரென்றும்,

தியாகத்திற்கு அர்த்தமே தெரியாதவரை தியாக தலைவியியென்றும்,

ஒரு களமும் காணாதவரை தளபதி என்றும் சொல்லிகொண்டிருப்பதை விட சவுக்கிட்டார் ஒன்றும் சகிக்கமுடியாததாக தெரியவில்லை

அப்பக்கமும் ஒருவன் கரும்பை கடித்துகொண்டு நானே செந்தமிழன் என்கின்றார், அவரையெல்லாம் விட்டுவிடுவார்கள்

இவர்களுக்கு யார் கொடுத்தார்?

திராவிட பெயர்களான பேரறிஞர் , கலைஞர், புரட்சி தலைவன், தலைவி, தியாக தீபம் போன்ற பெயர்களை பற்றி சொன்னால் அதெல்லாம் அடுத்தவன் கொடுத்ததாம்?

மகாத்மா, நேதாஜி, மூதறிஞர், கர்மவீரர் என்ற பட்டங்கள்தான் மக்களால் வழங்கபட்டது

இவர்களுக்கு யார் கொடுத்தார்?

மூதறிஞர் ராஜாஜி என அவர் அழைக்கபட்டால் இவர்கள் பேரறிஞர் என அண்ணாவினை அழைத்து கொண்டார்கள், இவர்கள் அழைக்காமல் ஐ.நா சபையா அழைத்தது?

தளபதி என பாகிஸ்தான் அரசா பட்டம் கொடுத்தது?

புரட்சி நடிகன் என அவரை திமுகவினரே அழைத்தார்கள், அவரே பின்பு தன்னை புரட்சி தலைவர் ஆக்கினார்,

அவர் வழியில் புரட்சி தலைவியும் வந்தார்

தியாக தலைவி, திராவிட செல்வன் எல்லாம் எங்கிருந்து வந்தது என்பது யாருக்குமே தெரியாது

உறுதியாக சொல்லலாம், சவுக்கிட்டாருக்கு முன்னோடி திராவிட அரசியலின் அடைமொழியன்றி வேறு எதுவுமல்ல